Jetisý oblysynyń polıtsııasy aýa raıyna baılanysty kúsheıtilgen jumys rejımine aýysty
TALDYQORǴAN. KAZINFORM- Búgin óńirde qalyń qar túsip, boran men kóktaıǵaqtyń saldarynan kólik qozǵalysy qıyndady. Joldaǵy jaǵdaıdy baqylaýǵa alyp, jedel áreket etý úshin 60 patrýldik qyzmet batalonynyń qyzmetkeri men 28 avtopatrýl ekıpajy jumyldyryldy.
Jetisý oblystyq polıtsııa departamentiniń dereginshe, jolaýshylardyń qaýipsizdigin qamtamasyz etý jáne jol-kólik oqıǵalarynyń aldyn alý úshin polıtsııa qyzmetkerleri kúsheıtilgen qyzmet rejımine aýysty.
Qazirgi ýaqytta «Almaty – Óskemen» baǵytyndaǵy mańyzdy jol ýaqytsha jabyldy. Barlyq kólik túrleriniń qozǵalysyna shekteý qoıyldy.
- Joldardaǵy jaǵdaıdy baqylaý úshin 60 patrýldik qyzmet batalonynyń qyzmetkeri men 28 avtopatrýl ekıpajy jumyldyryldy. Operatıvti málimetterge sáıkes, qolaısyz kóriný men muztaıǵaq jaǵdaıynda oblys joldarynda 182 júk kóligi men 200 jeńil avtokólikke shekteý qoıyldy. Polıtseıler júrgizýshilerge kómek kórsetip, joldaǵy tártipti qamtamasyz etip, kólik qozǵalysyn úılestirýde, - dedi Jetisý oblysy polıtsııa departamenti.
Jergilikti polıtsııa qyzmetkerleri aımaq turǵyndaryn asa qajettilik bolmaǵan jaǵdaıda jolǵa shyqpaýǵa shaqyrady. Eske salaıyq osyǵan deıin Altyn Emel asýynyń ýaqytsha jabylǵanyn jazǵanbyz.