Jetisý oblysynyń elektr jelilerin jańǵyrtýǵa 9,16 mlrd teńge bólindi
ASTANA. KAZINFORM – Jetisý oblysynda elektr jelilerin jańǵyrtý jáne qaıta jańartý jumystary qarqyndy júrgizilip jatyr. Joba Qazaqstannyń Damý banki men «Taldyqorǵan aktsıonerlik kólik-elektr jelileri kompanııasy» AQ-nyń birlesken qarjylyq qoldaýymen júzege asyrylýda.
Qazirgi ýaqytta óńirdegi nysandarda qurylys-montajdaý jumystary bastalǵan. Eskeldi, Kóksý, Qaratal jáne Sarqan aýdandarynda elektr berý jelilerine arnalǵan 4 492 jańa tirek ornatyldy.
– Nysandarda qurylys-montajdaý jumystary bastaldy. Eskeldi, Kóksý, Qaratal jáne Sarqan aýdandarynda elektr berý jelileriniń túrli úlgidegi 4 492 jańa tiregi ornatyldy. Aqsý jáne Kerbulaq aýdandarynda ınfraqurylymdy jańǵyrtýdyń kelesi kezeńderine daıyndyq júrgizilýde, – dep habarlady jobaǵa jaýapty taraptar.
Atalǵan bastamany iske asyrý úshin buǵan deıin Qazaqstannyń Damý banki men «Taldyqorǵan aktsıonerlik kólik-elektr jelileri kompanııasy» AQ arasynda 9,16 mlrd teńge kóleminde nesıelik jeli ashý týraly kelisim jasalǵan.
Joba «Energetıka jáne kommýnaldyq sektorlardy jańǵyrtý» ulttyq jobasy aıasynda júzege asyrylyp jatyr.
– Joba sheńberinde túrli kerneýdegi 474 shaqyrymnan astam elektr berý jelisi jańǵyrtylyp, kabeldik jeliler aýystyrylady. Sonymen qatar eki iri qosalqy stantsııa tolyq qaıta jańartýdan ótedi. Bul óńir turǵyndaryn turaqty elektr energııasymen qamtamasyz etip, jelilerdiń tozý deńgeıin tómendetýge múmkindik beredi, – delingen habarlamada.
Jobany tolyq aıaqtap, nysandardy paıdalanýǵa berý 2027 jyldyń qańtaryna josparlanǵan.
Aıta keteıik, Jetisý oblysynda «Qoıtas» ekoparkiniń qurylysy jalǵasyp jatyr.
