Jetisý oblysynyń bilim jáne energetıka mamandary marapattaldy
TALDYQORǴAN. KAZINFORM – Oblys ákimi Beıbit Isabaev birqatar sala mamandaryna memlekettik marapattar tapsyrdy.
Jetisý oblysy ákiminiń baspasóz qyzmeti málim etkendeı, óńir basshysy energetıka qyzmetkerleriniń kásibı merekesine oraı sala mamandaryna jáne Táýelsizdik kúnine baılanysty birqatar ustazǵa memlekettik marapattar tapsyrdy.
- Energetıka - eldiń damýy men órkendeýiniń negizi. Ekonomıkanyń qaı salasyn da, tipti halyqtyń kúndelikti turmysynyń ózin jylý men elektrsiz elestetý múmkin emes. Sala mamandaryna oblys turǵyndary atynan rızashylyq bildiremin, - dedi ákim.
Energetıka salasyn damytýǵa qosqan úlesi úshin «Temirbeton» JShS tehnologııalyq jabdyqtardyń slesar-jóndeýshisi Manarbek Murtazın ІІІ dárejeli «Eńbek dańqy» ordenin ıelendi. «TATEK» AQ tehnıkalyq dırektory Dáýlet Ilıpbaevqa, «Taldyqorǵanjylýservıs» KMK bas ınjeneri Aqylbaı Tájıevke, «Tekeli energokesheni» JShS qazandyq týrbınalyq tsehynyń bastyǵy Vladımır Korjǵa «Eren eńbegi úshin» medali berildi.
Sondaı-aq, Taldyqorǵan qalasy Yntymaq aýylyndaǵy №30 orta mekteptiń dırektory Sáýle Ýsenovaǵa «Qurmet» ordeni, Qaratal aýdanyndaǵy orta mekteptiń muǵalimderi Svetlana Goncharova men Nurzııa Rahmetovaǵa «Shapaǵat» medali, Báten Danııarova men Almagúl Maldybekovaǵa jáne Kemel Toqaev atyndaǵy qaıyrymdylyq qorynyń ókili Valentına Spırıdonovaǵa QR Prezıdentiniń Alǵys haty tabystaldy.
