Jetisý oblysynyń Alakól aýdanynda dárigerlik pýnktter ashyldy
Respýblıka kúni merekesi qarsańynda Alakól aýdanynyń Yntaly, Qarlyǵash jáne Baızerek aýyldarynda blokty-modýldi medıtsınalyq pýnktteri halyq ıgiligine berildi, dep habarlaıdy Kazinform.
Endi atalǵan úsh aýyldyń 1300-den astam turǵyny sapaly medıtsınalyq kómek alý úshin aýdan ortalyǵyna sabylmaıtyn boldy. Shaǵyn eldi mekenderdegi mundaı blokty-modýldi medıtsınalyq pýnktter jyldam salynady, jobanyń quny aýqymdy qarajatty talap etpeıdi.
Al bul úsh eldi mekenniń de buǵan deıingi medıtsınalyq ortalyǵy sonaý 1975 jyly, Baızerek pen Qarlyǵashtaǵy medpýnktter 1994 jyly shlakty-betondy qospadan salynyp, ambýlatorııaǵa yńǵaılandyrylǵan eken. Jańa blokty-modýldi medıtsınalyq pýnktter zamanaýı medıtsınalyq quraldarmen jabdyqtalǵan. Munda alǵashqy medıtsınalyq-sanıtarlyq kómek, ekpe egý, skrınıng, akýsherlik jáne EKG apparaty arqyly tekserý qyzmetteri kórsetiledi.
«Bizdiń aýyldaǵy medpýnkt tozyp turǵan. Endi jańa ǵımarat paıdalanýǵa berilip otyr. Іshinde emge qajetti jaǵdaıdyń bári jasalǵany bizdi qýantty», - dedi Yntaly aýylynyń turǵyny Qaldyqan Abdrasılova.
Ǵımarattardyń qurylys jumystaryn «SheberMetall» JShS júrgizdi. Bul nysandardy salýǵa oblystyq bıýdjetten 150 mln teńge bólindi. Medpýnktter salynǵan aýyldarda, máselen, Yntaly aýylynda 637 adam, Qarlyǵash aýylynda 446 adam jáne Baızerek aýylynda 280 adam turady.
Jalpy bul aımaqta 1 aýdandyq ortalyq aýrýhana, 2 aýyldyq aýrýhana, 19 aýyldyq dárigerlik ambýlatorııa, 17 medıtsınalyq pýnkt, 4 feldsherlik akýsherlik pýnkt aýdan halqyna turaqty qyzmet etedi. Budan bólek, qazir aýdan ortalyǵynan 60 shaqyrymda ornalasqan Qamysqala aýyldyq dárigerlik ambýlatorııanyń qurylysy da júrip jatyr. Jyl sońynda bul nysan qoldanysqa beriledi.
