Jetisý oblysynyń ákimdigi Jaidarman TOP jeńimpazdaryn marapattady
TALDYORǴAN. KAZINFORM - «Shapalaq» komandasy -Jetisý oblysynyń alǵashqy chempıondary. Jaidarman TOP joǵary lıga oıyndarynyń 25 jyldyq tarıhynda Jetisý oblysynan shyqqan alǵashqy chempıondar aımaqtyń mártebesin asqaqtatyp, kóptiń nazaryn aýdardy.
Osyǵan oraı búgin Jetisý oblysy ákiminiń orynbasary Dıas Esdáýletov jeńimpazdarmen kezdesip, marapattady.
Bul oıynǵa jyl saıyn dástúrli túrde elimizdiń barlyq aımaqtarynan 193 komanda qatysyp, olardyń ishinen iriktelgen 16 komanda jyl boıy respýblıkalyq joǵary lıga oıyndarynda óner kórsetti.
2024 jylǵy 23 qarashada ótken Jaidarman TOP joǵary lıga oıyndarynyń aqtyq saıysyna Taldyqorǵannan «Shapalaq», Semeıden «Qyzdarskıı», Jańaózendik «Ne habar», Almatylyq «Everest», Oraldan «Talant», Jambyl oblysynan «Jýaly» komandalary qatysty. Alty komandanyń ishinen sýyrylyp shyqqan jetisýlyq «Shapalaq» komandasy 1 orynǵa ıe bolyp, qanjyǵasy maılanyp qaıtty. Júlde- 50 mıllıon teńge.
Al, «Shapalaq» komandasynyń kapıtany Serikbaı Orynbasar fınalda erekshe sheberlik kórsetip, úzdik oıynshy atandy.
Búgingi marapattaý rásiminde jeńimpazdardy quttyqtaǵan oblys ákiminiń orynbasary Dıas Esdáýletov komandanyń jetistigin aıta kele, bolashaqta jeńis tuǵyrynan túspeńder degen tilek bildirdi.
«Shapalaq komandasynyń tarıhyn jaqsy bilemin. 2014 jyly qurylyp, búginde oblystan shyqqan tuńǵysh chempıon bolyp otyrsyzdar. Sizderdiń júrip ótken joldaryńyz, tájirıbelerińiz óńirimizdegi jas komandalarǵa úlgi, jańa bastaý, bolashaq chempıondarǵa jol ashady dep senemin. Biz Jetisý oblysynyń ákimdigi árdaıym Jaıdarman qozǵalysyn qoldaımyz. Ózderińiz bilesizder turaqty túrde oblystyq lıga, ákim kýbogi, Alakól alaýlary, respýblıkalyq basqa da týrnırler ótkizilip júr, aldaǵy ýaqytta birlesken jobalarymyz artady», – dedi Dıas Esdáýletov.
Komandanyń jigitteri Serikbaı Orynbasarǵa, Madııar Jumabaevqa, Álı Qusaıynovqa Jetisý oblysy ákiminiń alǵys hattary, 1 000 000 teńgelik qarjylaı sertıfıkattar tabystaldy.