Jetisý oblysyndaǵy jaýyn sýynan zardap shekken aýyldardyń jaǵdaıy qalaı
Jetisý oblysyndaǵy Eskeldi aýdanynyń Abaı, Eshkiólmes jáne Qarabulaq aýyldaryn tabıǵat apatynan zardap shekken bolatyn. Qazir atalǵan aýyldaǵy qurylys jumystary aıaqtalyp, úısiz qalǵan turǵyndar baspanamen qamtyldy, dep habarlaıdy Kazinform.
Jaqynda oblys ákimi Beıbit Isabaev turǵyndarmen júzdesip, jóndeýden ótken úılerdi aralap kórdi.
Aýyl azamattary ótken jolǵy kezdeskende aıtylǵan kóshege asfalt tóseý, jaryq shamdaryn ornatý týraly ótinishteriniń oryndalǵanyn tilge tıek etti. Sol sııaqty Qarabulaq pen osy aýyl aralyǵyna júretin qoǵamdyq kóliktiń marshrýty uzartylyp, qatynas jıiligi de artqan. Nóser saldarynan búlingen úıleri de ýaqytyly qalpyna keltirilgen. Endigi tilek, sý basý qaýpin boldyrmaý máselesi nazardan tys qalmasa eken deıdi olar. Sol kezdesýde baspanalaryn qalpyna keltirýmen qatar turǵyndar atalǵan aýyl kósheleriniń Abaı, Eshkiólmes jáne Qarabulaq oblys basshysy Abaı, Qarabulaq, Eshkiólmes aýyldaryndaǵy birneshe kósheni aralap kórdi.
Jańbyr sýynan zardap shekkenderdiń biri - Beıbit Ókeshev. Úıi apatty dep tanylǵandyqtan Ókeshevter otbasyna Qarabulaqtan baspana satyp áperilgen. Úı ıesi Qarabulaqqa kelgen oblys ákimine jańa qonysynyń qazirgi jaı-kúıin kórsetip, óz rızashylyǵyn jetkizdi.
- Abaı aýylynda sý basyp qalǵan úıimdi komıssııa jaramsyz dep taýyp, bir aı shamasynda óz kelisimimmen Qarabulaqtan baspana satyp áperdi, qazir sol qonysqa kóship kelip otyrmyn. Burynǵy úıimde kómir tasyp, ot jaǵatynbyz. Bul úıge gaz qosylǵan. Bes bólmeli. Biz jas otbasymyz. Ásirese, qolymdaǵy jasy egde tartqan áke-shesheme jaıly bolǵanyna qýandym. Ózim kólik júrgizýshi bolyp jumys isteımin. Qıyn kezde biz ózimizdiń jalǵyz emes ekenimizdi sezindik, - deıdi B.Ókeshev.
Aýdan ákimdiginiń málimetine súıensek, úsh aýyldaǵy sý basý oqıǵasynan keıin arnaıy komıssııanyń saraptamasy men baǵalaý qorytyndysynda jalpy sany 105 úıdiń zardap shekkeni anyqtalǵan. Sonyń ishinde 22 úı buzýǵa jatady, 83 úı kúrdeli jóndeýge jaramdy dep tanylǵan. Zardap shekkenderdiń baspana máselesin sheshý úshin oblystyq rezervtik qordan 336,7 mln. teńge qarastyryldy. Sonyń negizinde 22 turǵyn úı satyp áperilip, 83 úıdiń 78-ine jóndeý jumystaryna qarjylaı kómek kórsetilgen, 5 úıdiń qujattaryn zańdastyrý jalǵastyrylýda.
Sonymen qatar Abaı aýylyndaǵy Baqtybaı kóshesine 3,1 mln teńgege 32 jaryq shamy ornatylǵan. Eshkiólmes aýylyndaǵy Tynyshpaev kóshesiniń 1,63 kılometrine 49,9 mln teńgege asfalt tóselip, 5,4 mln teńgege 70 kóshe shamy qoıyldy. Qazir Ýshakov kóshesine asfalt tóseý úshin negiz daıyndalyp, qubyrly ótkelder aýystyryldy. Asfalt qarashanyń alǵashqy onkúndiginde tóselip bitýi tıis.
Bul rette demeýshilerdiń de kómegin erekshe atap ótken oryndy. Máselen, Eshkiólmes aýylyndaǵy Kýtýzov kóshesine 5 jaryq shamy ornatylyp, Abaı aýylyndaǵy A. Jangeldi kóshesinde 202 metrge, Eshkiólmes aýylyndaǵy Kýtýzov kóshesine 314 metr jolǵa, Qarabulaq aýylyndaǵy Sverdlov kóshesinde 1,2 km jolǵa qıyrshyq tas tóseýge metsenattar qarjylaı qoldaý kórsetken.
