Jetisý oblysyndaǵy mektepterdiń biriniń ashanasynan shyqqan tyshqan jurtty dúrliktirdi
TALDYQORǴAN. KAZINFORM- Áleýmettik jelide mektep ashanasynda tyshqan júrgeni týraly jazba taraǵan edi. Bul oqıǵa boıynsha Aqsý aýdandyq bilim bólimi jaýap berdi.
Telegram kanaldardyń birinde mektep ashanasynda júrgen tyshqandy túsirgenderdiń beınejazbasy tarady. Bir tańqalarlyǵy tyrs etken dybystan zytyp joǵalatyn zııankes adam jaqyn baryp vıdeoǵa túsirip jatsa da, qashpaıdy. Álde qasha almaıdy.
Bolǵan jaǵdaıǵa baılanysty Jetisý oblysy, Aqsý aýdandyq bilim bólimi jaýap berdi.
- Joǵaryda kórsetilgen vıdeo Aqsý aýdany Qarakemer orta mektebiniń ashanasy ekeni anyqtaldy. Ashanany paıdalaný boıynsha 2024-2025 oqý jylyna merdiger «Sheber JK bolyp anyqtalǵan. Merdiger mektep ashanasyna deratızatsııa jumystaryn júrgizýge QR DSM sanıtarlyq-epıdemologııalyq baqylaý komıtetiniń «Ulttyq saraptama ortalyǵy» ShJQ RMK Jetisý oblysy boıynsha fılıalynyń Aqsý aýdandyq bólimshesimen oqý jylynyń basynda kelisimshart jasalǵan. 2024 jyly qarasha aıynda mektep ashanasyna «Fıprat ALT» TB atty preparatpen deratızatsııa jumystary júrgizilgen. Aýdan boıynsha bilim berý uıymdaryna oqý jylynyń basynda QR DSM sanıtarlyq-epıdemologııalyq baqylaý komıteti Aqsý aýdandyq sanıtarlyq-epıdemologııalyq baqylaý basqarmasy tarapynan tekserý jumystary júrgizilgen,- dedi Aqsý aýdandyq bilim bólimi.
Al aýdandyq sanıtarııalyq- epıdemııalogııalyq baqylaý basqarmasy zań júzinde jospardan tys tekserýler anonımdik joldanymdar bolǵan jaǵdaılarda júrgizilmeıtinin málimdedi.
- Beınejazbada kórsetilgen faktiler boıynsha Aqsý aýdandyq sanıtarııalyq-epıdemıologııalyq baqylaý basqarmasy jospardan tys tekserý júrgizý úshin «E-ótinish» portaly arqyly halyqtyń ómiri men densaýlyǵyna zııan/qater keltirýdiń naqty faktileri kórsetilgen buzýshylyqtardy kórsete otyryp ótinish joldaý qajettigin habarlaımyz,- dedi Aqsý aýdandyq sanıtarııalyq-epıdemıologııalyq baqylaý basqarmasynyń bólim basshysy Áıgerim Sanaqqyzy.
Eske salaıyq osyǵan deıin Jetisý oblysynda 4000 oqýshy tyıym salynǵan saıttarǵa kirgenin jazǵanbyz.