Jetisý oblysyndaǵy mektep medpýnktteri qajetti quraldarmen qamtamasyz etilmegen
ASTANA. KAZINFORM — Jetisý oblysynyń Aqsý aýdanynda oqýshylarǵa medıtsınalyq kómek kórsetýde zańbuzýshylyqtar anyqtaldy. Tekserý barysynda birneshe mekteptiń oqýshylary tıisti medıtsınalyq kómeksiz qalǵany belgili boldy.
Jetisý oblystyq prokýratýrasynyń málimetinshe, mekteptegi medıtsınalyq pýnktter qajetti dárilik zattarmen jáne qural-jabdyqtarmen jasaqtalmaǵan.
— Birqatar mektepte oqýshylar sany belgilengen normatıvten assa da, medıtsına qyzmetkerleri shtattyq rejımge saı emes. Sonyń saldarynan 3 myńnan astam bala der kezinde medıtsınalyq kómek alý quqyǵynan is júzinde shektelgen, bul QR Konstıtýtsııasy men zańnamasynyń normalaryn tikeleı buzý, — delingen aqparatta.
Prokýratýra málimetinshe, qadaǵalaý aktisin qaraý nátıjeleri boıynsha kináliler zań boıynsha jaýapqa tartylǵan. Tıisti mekemeler buzýshylyqtardy joıý boıynsha sharalar qabyldap jatyr.
— Kámeletke tolmaǵandardyń múddelerin qorǵaý jáne óskeleń urpaqtyń densaýlyǵyn saqtaý oblys prokýratýrasy qyzmetiniń basym baǵyttary bolyp qala beredi. Bul baǵyttaǵy júıeli jumys buzylǵan quqyqtardy ýaqtyly qalpyna keltirýge jáne aldaǵy ýaqytta mundaı zańbuzýshylyqtarǵa jol bermeýdi kózdeıdi, — dep jazdy prokýratýranyń baspasóz qyzmeti.
Aıta keteıik, Pavlodar qalasynyń prokýrorlary halyqqa medıtsınalyq kómek kórsetýge arnalǵan «Áleýmettik medıtsınalyq saqtandyrý qory» KEAQ-tyń bıýdjet qarajaty men aktıvteriniń jumsalýyna júrgizilgen tekserý barysynda jalǵan qyzmet kórsetý faktilerin anyqtady.
Sondaı-aq Mańǵystaý oblysynyń medıtsına salasy boıynsha 600 mln teńgeden astam jymqyrý deregi anyqtaldy.
