Jetisý oblysyndaǵy mektep qurylysyna qaıtarylǵan aktıvter esebinen 5,5 mlrd teńge baǵyttaldy
ASTANA. KAZINFORM - Prezıdenttiń zańsyz ıemdenilgen aktıvterdi qaıtarý jónindegi tapsyrmalaryn oryndaý sheńberinde Arnaýly memlekettik qordan Jetisý oblysynda jańa jalpy bilim beretin mektep salýǵa 5,5 mlrd teńge bólindi, dep habarlaıdy Úkimettiń baspasóz qyzmeti.
Kóksý aýdanynyń Balpyq bı aýylynda 600 oqýshyǵa arnalǵan jańa mektep salynyp jatyr. Jańa nysanǵa degen qajettilik halyq sanynyń ósýi jáne qoldanystaǵy bilim berý ınfraqurylymyna túsetin júktemeniń artýyna baılanysty týyndap otyr. Jańa mektep balalarǵa turǵylyqty jerine jaqyn jerde zamanaýı bilim berý ınfraqurylymyna qol jetkizýge múmkindik beredi.
Qurylysty 2027 jyldyń sońyna deıin aıaqtaý josparlanyp otyr.
-Aktıvterdi qaıtarý boıynsha jumys sheńberinde Úkimet 610 mlrd teńge somasyna 500-den astam áleýmettik jobany qarjylandyrýdy maquldady. Qor qarajaty búkil el boıynsha bilim berý, densaýlyq saqtaý, sporttyq jáne kommýnaldyq ınfraqurylym nysandaryn salýǵa jáne jańǵyrtýǵa baǵyttalady. Bilim berý salasynda 64,4 mlrd teńge somasyna 17 joba júzege asyrylyp jatyr,-delingen habarlamada.
Osyǵan deıin qaıtarylǵan aktıvterden túsken qarjynyń qaıda jumsalyp jatqany týraly jazdyq.
