Jetisý oblysyndaǵy elektr jelileriniń 80 paıyzy tozǵan
Búginde Jetisý oblysynda 13,7 myń shaqyrymǵa jetetin elektr jelileri bar. Al óńirdi qýatpen qamtamasyz etetin 2,6 myń qosalqy stantsııa jumys isteıdi, dep habarlaıdy Kazinform.
Mamandardyń esebinshe, jaryq kózimen jabdyqtaý obektileriniń tozýy 80 paıyzdan asyp ketken.
Monıtorıng aımaqty elektr qýatymen qamtyp otyrǵan monopolıst mekeme - «TATEK» aktsıonerlik qoǵamyndaǵy jaǵdaı óte kúrdeli ekenin kórsetken. Mundaǵy elektr jelileri men qosalqy statsııalardaǵy qurylǵylardyń tozýy 87,2 paıyzdy quraǵan.
Al oblys bıligi tıisti mınıstrlikpen birlesip óńirde apatty jaǵdaıdyń aldyn alýǵa kirisken.
Osy maqsatta 130 myńnan astam turǵyndy elektr jaryǵymen qamtýǵa múmkindik beretin 47,8 shaqyrym jeli men 3 qosalqy stantsııa jaqyn arada jańǵyrtylmaq. Jobany iske asyrý boıynsha 11,7 mlrd teńge bólinedi.
«Bıyl 47,8 shaqyrym elektr jelisi men 3 qosalqy stantsııa jańǵyrtylady. Nátıjesinde oblystyń 130 myńnan astam turǵyny sapaly elektr qýatyn alatyn bolady. Jalpy, 2023-2029 jyldar aralyǵynda qýat kózderine tartylatyn ınvestıtsııanyń jalpy kólemi 11,7 mlrd teńgege jetedi.Nátıjesinde 7 jyl ishinde jeliler men jabdyqtardyń 12 paıyzy jańartylyp, tozý deńgeıi 15 paıyzǵa tómendeıdi. Sondaı-aq, bıýdjet esebinen 232,5 shaqyrym jeli men 2 transformatorlyq qosalqy stantsııanyń qurylysy jáne qaıta jańartý josparlanýda», - deıdi Jetisý oblystyq energetıka jáne turǵyn úı-kommýnaldyq sharýashylyq basqarmasynyń basshysy Aıdos Beketaev.
