Jetisý oblysyndaǵy Dostyq úıiniń basshysyna qatysty qate aqparat taraǵan
ASTANA. KAZINFORM – Jetisý oblystyq qoǵamdyq damý basqarmasyna qarasty «Qoǵamdyq kelisim» KMM basshysy Rýfına Ýsanova jol-kólik oqıǵasyna ushyraǵan kezde alkogoldi ishimdik ishpegen.
R. Ýsanova jol-kólik oqıǵasyn týyndatqannan keıin (Taldyqorǵan qalasyndaǵy Rakıshev kóshesimen shyǵys baǵytta júrip kele jatyp, «Magným» saýda úıiniń janynda araqashyqtyqty saqtamaı aldyndaǵy «VAZ 11183» kóligine soǵylǵan) medıtsınalyq kýálandyrýdan ótedi. Onyń nátıjesi alkogoldi ishimdik ishpegenin kórsetedi. Osylaısha, sotqa ákimshilik quqyq buzýshylyq jasaǵany týraly hattamanyń kóshirmesi (№243310030025307, 20.05.2024 jyly saǵat 19:24-te toltyrylǵan) jáne medıtsınalyq kýálandyrý qorytyndysy (№3109, 20.05.2024 jyly saǵat 19:35-te berilgen) usynylady.
Taldyqorǵan qalalyq ákimshilik quqyq buzýshylyqtar jónindegi mamandandyrylǵan aýdanaralyq soty 31 mamyrda R. Ýsanovany QR ÁQBtK-niń 610-babynyń 1-bóliginde kózdelgen ákimshilik quqyq buzýshylyqty jasaǵany úshin kináli dep tanyp, 73 840 teńge kóleminde aıyppul salý týraly qaýly (3312-24-00-3/1934) shyǵarady.
Taǵy bir aıta ketetin jaıt, sot qaýlysynda jaýapker týraly málimet qate beriledi. Atap aıtqanda, jumyssyz dep kórsetiledi. Alaıda R. Ýsanova óziniń jumys ornyn (Jetisý oblystyq qoǵamdyq damý basqarmasyna qarasty «Qoǵamdyq kelisim» KMM) ataǵan. Buǵan sot otyrysynda jazylǵan aýdıo, vıdeojazbalar dálel. Osyǵan oraı, Taldyqorǵan qalalyq ákimshilik quqyq buzýshylyqtar jónindegi mamandandyrylǵan aýdanaralyq sotynyń sýdıasy A. Kalpebaeva óz bastamasymen isti qarap shyǵyp, 5 maýsym kúni 31 mamyrda shyǵarylǵan qaýlyǵa ózgertý engizý qajettigi týraly Anyqtama (№ 3312-24-00-3/1934, 05.06.2024 jyl) beredi. Atap aıtqanda, qaýlynyń kirispe bólimindegi jumys orny týraly «ýaqytsha jumyssyz» degen sózderdi «Jetisý oblystyq qoǵamdyq damý basqarmasyna qarasty «Qoǵamdyq kelisim» KMM basshysy» dep ózgertýdi naqtylaıdy.
10 maýsymda birqatar BAQ pen áleýmettik jelilerde «Jetisý oblysynda memlekettik qyzmetker mas kúıinde kólik júrgizgen» degen taqyryppen aqparat jarııalanǵan. Osy oraıda, Kazinform agenttigi Jetisý oblysyndaǵy menshikti tilshi qate aqparat usynýyna baılanysty keshirim suraı otyryp, materıaldyń mátini durys nusqasymen almastyrylatynyn málimdeıdi.
