Jetisý oblysyndaǵy áıeldiń ólimine qatysty is erekshe baqylaýǵa alyndy

TALDYQORǴAN. KAZINFORM – Áleýmettik jelilerde Jetisý oblysynyń Aqsý aýdanyna qarasty Balasaz aýylynda oryn alǵan aýyr qylmys týraly aqparat tarady. Onda 32 jastaǵy Aızat Jýmanovanyń ólimine qatysty jaǵdaı baıandalǵan. Osy jaǵdaıǵa baılanysty Kazinform tilshisi oqıǵanyń mán-jaıyn anyqtaýǵa tyrysty.

Polıtsııanyń málimetinshe, 2025 jylǵy 22 maýsym kúni saǵat 02:30 shamasynda aýyr háldegi Aızat Jýmanova oblystyq aýrýhanaǵa jetkizilgen. Dárigerler kelgennen keıin jarty saǵat ishinde onyń qaıtys bolǵanyn tirkegen. 

Qasaqana aýyr dene jaraqatyn salý faktisi boıynsha, jábirlenýshiniń qaıtys bolýyna ákep soqqan qylmysqa qatysty polıtsııa tarapynan sotqa deıingi tergep-tekserý amaldary bastaldy. 

– Atalǵan qylmystyq is Jetisý oblysy polıtsııa departamenti basshylyǵynyń erekshe baqylaýyna alyndy. Qazirgi ýaqytta kúdikti retinde jábirlenýshiniń jubaıy ustalyp, ýaqytsha ustaý ızolıatoryna qamaldy, - dep naqtylady vedomstvodan. 

Polıtsııa ókilderiniń aıtýynsha, tergeý aıasynda barlyq qajetti jedel-tergeý sharasy júrgizilip jatyr. Sot-medıtsınalyq saraptamalar taǵaıyndalyp, iske qatysy bar tulǵalardyń barlyq ýáji men dálelderi muqııat tekserilip jatyr. 

– Tergeý protsesi zań talaptaryna saı oryndalýda. Qylmystyq is boıynsha obektıvti jáne jan-jaqty sheshim qabyldanýy úshin barlyq dálel tolyq kólemde qaralady. Qylmysqa kináli tulǵalar zań aıasynda jaýapqa tartylady, - dedi polıtsııa departamentinen. 

Aıta keteıik, marqumnyń týystary bul isti asa qatygezdikpen jasalǵan kisi óltirý retinde qaıta saralaýdy talap qoıyp otyr. Olar Aızat Jýmanova aýyr azaptaýǵa ushyrap, qatygezdikpen óltirilgenin alǵa tartady. Qaza tapqan áıeldiń artynda eki jasar qyzy qalǵan. Januıa músheleriniń aıtýynsha, oqıǵa sábıdiń kóz aldynda bolǵan. 

Іs boıynsha ózge aqparat tergeý múddesine saı jarııa etilmeıdi. 

Buǵan deıin, Jetisý oblysynda kúıeýi áıelin óltirdi degen kúdikke ilingenin jazǵanbyz.