Jetisý oblysyndaǵy aýyldardy sýmen qamtýǵa 480 mln teńge bólindi
ASTANA. KAZINFORM – Prezıdent tapsyrmasy boıynsha Jetisý oblysyndaǵy aýyldardy sýmen qamtýǵa Arnaýly memlekettik qordan qarjy bólindi. Bul týraly Úkimettiń baspasóz qyzmeti habarlady.
Memleket basshysynyń tapsyrmasyn júzege asyrý aıasynda óńirlerde azamattardyń ómir súrý sapasyn jaqsartý maqsatynda qaıtarylǵan aktıvter esebinen áleýmettik mańyzy bar ınfraqurylymdy damytý jumystary júrgizilip jatyr.
Úkimet Arnaýly memlekettik qordan Jetisý oblysyndaǵy sýmen jabdyqtaý júıelerin jańǵyrtýǵa jáne qurylys jobalaryna 480 mln teńge bóldi.
Joba boıynsha Alakól aýdanynyń Qońyr aýylynda uzyndyǵy 17 shaqyrym sý jelisin tartý jáne Qaratal aýdanynyń Umtyl aýylynda 4,8 shaqyrym sý jelisin júrgizý josparlanǵan. Nátıjesinde, myńnan astam aýyl turǵyny aýyz sýmen qamtylady.
Bıyl Jetisý oblysynda sýmen jabdyqtaý júıesin jańǵyrtý jáne salý boıynsha barlyǵy 18 joba júzege asyrylyp jatyr. 2025 jyldyń sońyna qaraı óńirdegi ortalyqtandyrylǵan aýyz sýmen qamtylǵan aýyldardyń úlesin 99,9%-ǵa deıin jetkizý josparlanyp otyr. Bul – 329 aýyl men shamamen 697 myń oblys turǵyny.
Aıta keteıik, Qyzylorda oblysynyń Aral jáne Qazaly aýdandaryndaǵy 2 myńǵa jýyq turǵyny bar aýyldardy sýmen qamtýǵa 2,2 mlrd teńge bólinedi.