Jetisý oblysyndaǵy Alakólde 7 balasy bar otbasy evakýatsııalandy
ASTANA. KAZINFORM — Jetisý oblysyndaǵy Alakól kólinde qutqarýshylar aýa raıynyń kúrt nasharlaýyna baılanysty qaýipti jaǵdaıda qalǵan 7 balasy bar otbasyn evakýatsııalady. Kúshti jeldiń saldarynan demalýshylar jaǵaǵa ózdiginen qaıta almaı qalǵan.
Oqıǵa Aqshı aýyly mańynda, «Kóktem Grand» demalys aımaǵyna jaqyn jerde bolǵan. Toǵyz adamnan turatyn otbasy, onyń ishinde jeti bala bar, qaırańda bolǵan kezde kólde jel kenet kúsheıgen. Sonyń saldarynan bıik tolqyndar kóterilip, jaǵaǵa qaıtý múmkin bolmaı qalǵan.
Qutqarýshylar oqıǵa ornyna jedel jetip, Aqshı aýylyndaǵy jedel-qutqarý jasaǵy men Alakól aýdandyq TJ bóliminiń qyzmetkerleri birlesip jumys júrgizdi. Olar qutqarý qaıyǵy arqyly barlyq demalýshylardy qaýipsiz jerge jetkizdi.
Baqytymyzǵa oraı, zardap shekkender joq. Evakýatsııalanǵan adamdarǵa medıtsınalyq kómek qajet bolmaǵan.
Tótenshe jaǵdaılar mınıstrligi sýǵa shyǵar aldynda mindetti túrde aýa raıy boljamyn qarap shyǵý kerektigin eskertedi. Jel kúsheıip, aýa raıy nasharlaǵan jaǵdaıda sý mańyndaǵy serýennen bas tartyp, óz ómiri men balalardyń qaýipsizdigine qaýip tóndirmeý qajet ekenin aıtady.
Aıta keteıik, buǵan deıin Abaı oblysyndaǵy Alakól kólinde sýǵa batyp bara jatqan qyz balany qutqaryp, onyń anasy qaza tapqan bolatyn.
Al Almaty oblysy Qapshaǵaı sý qoımasynda eki adam sýǵa batyp ketti.
