«Denesi kókala qoıdaı" - Jetisý oblysynda 3 jasar bala aýrýhanaǵa tústi

TALDYQORǴAN. KAZINFORM — 2 aqpan kúni shamamen saǵat 21:00–de polıtsııaǵa «102» arnasy arqyly medıtsınalyq mekemeden úsh jasar balanyń aýrýhanaǵa jetkizilgeni týraly habarlama túsken. Aldyn ala málimet boıynsha, balanyń denesindegi jaraqattar zorlyq-zombylyq belgilerine uqsas.

Jetisý oblystyq polıtsııa departamentiniń málimetinshe, atalǵan derek boıynsha «Densaýlyqqa qasaqana aýyr zııan keltirý» baby boıynsha qylmystyq is tirkeldi.

Vedomstvo aqparatyna sáıkes, quqyq qorǵaý organdary habar túsken boıda otbasynyń turǵylyqty mekenjaıyna jedel barǵan. Qylmys jasady degen kúdikpen balanyń ákesi ustaldy. Er adamnyń alkogoldik mas kúıde bolǵany habarlandy. Ol ýaqytsha ustaý ızolıatoryna qamaldy.

Qazirgi ýaqytta anasy men bala medıtsınalyq mekemede jatyr. Zardap shekken balaǵa qajetti medıtsınalyq kómek kórsetilýde.

Atalǵan derek boıynsha tergeý jáne protsessýaldyq is-sharalar júrgizilip jatyr. Sotqa deıingi tergep-tekserý barysy Jetisý oblystyq polıtsııa departamenti basshylyǵynyń jeke baqylaýynda.

Buǵan deıin Jetisý oblysynda óz balasyn uryp-soqty degen kúdikpen áıel adamnyń ustalǵany habarlanǵan bolatyn.