Jetisý oblysynda jumyssyzdyq deńgeıi tómendedi
Jyl basynan Jetisý óńirinde 31 myńnan astam adam jumyspen qamtyldy. Jospar 100 paıyz oryndaldy, dep habarlaıdy Kazinform.
Oblystyq jumyspen qamtýdy úılestirý jáne áleýmettik baǵdarlamalar basqarmasynyń málimetinshe, jumyssyzdyq deńgeıin tómendetý maqsatynda 2023 jyldyń qańtarynda «Jetisý oblysynyń Óńirlik jumyspen qamtý kartasy» bekitilgen. Oǵan sáıkes bıyl 31 560, onyń ishinde ýaqytsha – 10 002, turaqty – 21 558 jumys orynyn qurý josparlanǵan.
«1 qarashaǵa deıin Óńirlik jumyspen qamtý kartasy sheńberinde 31 599 adam (turaqty – 21 106, ýaqytsha – 10 493) jumysqa ornalastyryldy nemese jospar 100,1% oryndaldy», - dedi basqarmadan.
Jumyspen qamtylǵandardyń basym kópshiligi aýyl sharýashylyǵy, qurylys pen óndiris, bilim, densaýlyq saqtaý jáne áleýmettik qyzmet kórsetý salalaryna ornalasty, 60%-y osy negizgi bes salaǵa tıesili. Basqarma tarapynan eńbek naryǵyndaǵy suranys pen usynys arasyndaǵy teńgerimsizdik máselesi zerdelenip, jumys berýshiler arasynda saýalnama júrgizilip otyrady. Sondaı-aq, óńirlik jumyspen qamtý kartasy jumyssyzdyq deńgeıiniń 5,1%-dan 4,8%-ǵa deıin tómendeýine yqpal etti.
«Jalpy, óńirlik jumyspen qamtý kartasy sheńberinde jumysqa ornalastyrý ındıkatorynyń oryndalýy turaqty, qoıylǵan mindetterdi iske asyrý boıynsha barlyq sharalar qabyldanady. Prezıdenttiń 2022 jylǵy 1 qyrkúıektegi tapsyrmasyn iske asyrý maqsatynda bıylǵy 1 qańtardan bastap jastarǵa jyldyq syıaqy mólsherlemesi 2,5%-dan jeńildetilgen shaǵyn nesıe berý qolǵa alyndy. Osy maqsatta Jetisý oblysyna 249 mırokredıt berýge 1 mlrd 245 mln teńge bólindi. Búgingi kúnge deıin 12 komıssııa otyrysy ótip, 274 bıznes-joba oń sheshimin taýyp, 268 adamǵa 1 235,4 mln teńge shaǵyn nesıe berildi», - dep habarlady oblystyq jumyspen qamtýdy úılestirý jáne áleýmettik baǵdarlamalar basqarmasynyń ókilderi.
Sonymen qatar ulttyq joba aıasynda halyqtyń áleýmettik osal toptaryna jańa bıznes ıdeıalardy júzege asyrý úshin 400 AEK (1 380 000 teńge) kóleminde 219 grant berý josparlanǵan bolatyn. Osy ýaqytqa deıin 219 adam 302,2 mln teńge grant aldy. 2024 jyly jastarǵa 1,3 mlrd teńge mólsherinde 260 mıkrokredıt jáne halyqtyń áleýmettik osal toptaryna 301,3 mln teńge kóleminde grant berý josparda tur.
