Jetisý oblysynda júkti áıeldiń ólimine qatysty tergeý júrip jatyr
ASTANA. KAZINFORM – Jetisý oblysynda júkti áıeldiń qaıtys bolýyna baılanysty qylmystyq is qozǵalyp, oqıǵanyń mán-jaıy tergelip jatyr. Marqumnyń týystary medıtsınalyq qujattardaǵy qaıshylyqtarǵa nazar aýdaryp, kórsetilgen medıtsınalyq kómektiń durystyǵyna kúmán keltiredi, dep habarlaıdy Kazinform tilshisi.
Marqumnyń ápkesi Anastasııa Jýktyń aıtýynsha, 2025 jylǵy 15 jeltoqsanda týǵan ápkesi Vıktorııa Naýmova dárigerge josparly tekserýge barǵan. Ýltradybystyq zertteý barysynda aıtarlyqtaı patologııa anyqtalmaǵan, tek qaǵanaq sýynyń azdyǵy tirkelgen.
Kelesi kúni júkti áıeldiń jaǵdaıy kúrt nasharlap, keshke qaraı ol Qarabulaq aýdandyq aýrýhanasyna jetkizilgen. 17 jeltoqsanda naýqas oblystyq perınataldyq ortalyqqa aýystyrylǵan.
Týystarynyń aıtýynsha, aýrýhanaǵa túsken sátte áıel esin biletin, sóılep, ózdiginen qozǵala alǵan. Oblystyq perınataldyq ortalyqqa jetkizilgennen keıin de ol jubaıymen telefon arqyly sóılesken.
– Ol tolyq esinde boldy, ózi júrip, sóıleı aldy. Oblystyq perınataldyq ortalyqqa aýysqannan keıin de kúıeýimen telefon arqyly baılanysqa shyqty, – dedi marqumnyń ápkesi Anastasııa Jýk.
Alaıda otbasynyń aıtýynsha, kúıeýi medıtsınalyq mekemege kelgen kezde dárigerler áıeldiń jaǵdaıy asa aýyr ekenin, kóp aǵzanyń isten shyqqanyn habarlaǵan.
Marqumnyń týystary 23 jeltoqsanda alǵan ólimnen keıingi qorytyndyǵa sáıkes, 17 jeltoqsan kúni saǵat 08:40-ta medıtsınalyq preparattyń ekinshi dozasy engizilgennen keıin naýqastyń jaǵdaıy kúrt nasharlaǵan. Sonyń saldarynan septıkalyq shok damyp, uryq shuǵyl operatsııa arqyly alynǵany kórsetilgen.
Alaıda 2026 jylǵy 9 qańtarda berilgen qorytyndy qujattyń ózge nusqasynda atalǵan preparatty engizý týraly málimet múlde joq.
Sonymen qatar týystaryn uryqtyń taǵdyry da alańdatyp otyr. Olardyń aıtýynsha, Taldyqorǵan qalasyndaǵy máıithanalarda bıomaterıaldyń túskeni tirkelmegen. Al medıtsına qyzmetkerleri uryqtyń joıylǵanyn aıtqanymen, bul jóninde resmı qujat nemese rastaý usynylmaǵan.
Vıktorııa Naýmova 2025 jylǵy 20 jeltoqsanda qaıtys boldy. Marqumnyń denesi sot-medıtsınalyq saraptamaǵa jiberilgen.
Jetisý oblysynyń polıtsııa departamenti bul derek boıynsha qylmystyq is qozǵalǵanyn habarlady.
– Qazirgi ýaqytta oqıǵanyń barlyq mán-jaıyn anyqtaýǵa baǵyttalǵan tergeý amaldary júrgizilip jatyr. Tergeý barysy departament basshylyǵynyń baqylaýynda, – dep málimdedi quqyq qorǵaý organdary.
Marqumnyń týystary istiń obektıvti ári jan-jaqty tergelýin talap etip otyr. Olardyń pikirinshe, bul jaǵdaıda medıtsına qyzmetkerleriniń salǵyrttyǵy men qujattardy qoldan burmalaý belgileri bolýy múmkin.
Aıta keteıik, buǵan deıin 3 jasar qyzdyń óliminen keıin 622 stomatologııalyq klınıka tekserilip jatqany habarlanǵan edi.