Jetisý oblysynda júkti áıeldiń ólimine baılanysty arnaıy komıssııa quryldy
TALDYQORǴAN. KAZINFORM – Jetisý oblysynda júkti áıeldiń ólimine qatysty arnaıy komıssııa qurylyp, tekserý jumystary bastaldy.
Oblystyq perınataldyq ortalyqtyń dırektory Nazgúl Imanǵalıevanyń aıtýyna qaraǵanda, tekserýdi Jetisý oblysy boıynsha medıtsınalyq jáne farmatsevtıkalyq qyzmet sapasyn baqylaý komıteti táýelsiz sarapshylardy tarta otyryp júrgizip jatyr.
– Naýqastyń ólimine baılanysty arnaıy komıssııa qurylyp, Jetisý oblysy boıynsha medıtsınalyq jáne farmatsevtıkalyq qyzmet sapasyn baqylaý komıteti tekserýdi bastady. Qazirgi ýaqytta barlyq materıal quqyq qorǵaý organdaryna berildi, sot-medıtsınalyq saraptama júrgizilip jatyr. Keshendi tekserý men sot-medıtsınalyq saraptama aıaqtalǵan soń kórsetilgen medıtsınalyq kómektiń sapasy men der kezinde kórsetilýine baǵa berilip, tıisti sheshimder qabyldanbaq. Saraptama men tekserýdiń barlyq nátıjesi marqumnyń týystaryna usynylady, - dedi Nazgúl Imanǵalıeva.
Eske salaıyq, buǵan deıin redaktsııamyzǵa marqum áıeldiń týǵan ápkesi habarlasqan edi.
Týystarynyń aıtýynsha, naýqas 2025 jyldyń jeltoqsan aıynda aýrýhanaǵa jatqyzylǵan, sodan keıin onyń jaǵdaıy kúrt nasharlaǵan. Otbasy medıtsınalyq qujattardaǵy sáıkessizdikterge nazar aýdaryp, emdeý taktıkasynyń durys bolǵanyna kúmándanyp otyr.
Atalǵan derek boıynsha qylmystyq is te qozǵaldy. Polıtsııa ókilderiniń habarlaýynsha, oqıǵanyń barlyq mán-jaıyn anyqtaý úshin tergeý júrgizilip jatyr.