Jetisý oblysynda jol boıyndaǵy temir qorshaýǵa soǵylǵan kólik júrgizýshisi mert boldy
TALDYQORǴAN. KAZINFORM- Kóksý aýdanynda jol kólik oqıǵasy bolyp, 59 jastaǵy júrgizýshi mert boldy. Oqıǵa boıynsha qylmystyq is qozǵaldy.
Jetisý oblystyq polıtsııa departamenti Kóksý aýdanynda jol apatynan 1 adamnyń qaıtys bolǵanyn málimdedi. Quzyrly organnyń dereginshe, Kóksý stantsııasy men Jetijal aýylynyń mańynda Mitsubishi avtokóligi jol boıyndaǵy metall qorshaýǵa soǵylǵan.
- Jaraqat alǵan júrgizýshi ortalyq aýrýhanaǵa jetkizildi, biraq dárigerlerdiń barlyq kúsh-jigerine qaramastan, ol alǵan jaraqattarynan reanımatsııada qaıtys boldy. Oqıǵa boıynsha qylmystyq is qozǵaldy,- delingen habarlamada.
Polıtsııa qyzmetkerleri júrgizýshilerge qys mezgilinde asa saq bolýdy jáne jol qozǵalysy erejelerin qatań saqtaýdy eskertedi. Eske salamyz buǵan deıin Jetisýda qarly boranda jolda qalǵan 12 adamnyń qutqarylǵanyn jáne Jetisý oblysynda kólik apatynan 2 adamnyń qaıtys bolǵanyn jazǵanbyz.