Jetisý oblysynda jol apatynan mert bolǵandar sany 33%-ǵa kóbeıgen
TALDYQORǴAN. KAZINFORM – Bıyl qańtar-mamyr aılary aralyǵynda Jetisýda 430 jol-kólik oqıǵasy tirkelip, saldarynan 52 adam qaza tapty. Bul týraly Kazinform agenttiginiń resmı saýalyna jaýap bergen oblystyq Polıtsııa departamenti málimdedi.
Vedomstvonyń aqparatyna sáıkes, ótken jyldyń sáıkes kezeńimen salystyrǵanda óńirde jol apattarynyń sany 86%-ǵa artqan (2024 jyly – 231), qaza tapqandar 33%-ǵa (2024 j. – 39), al jaraqat alǵandar 96%-ǵa (2024 j. – 339) kóbeıgen.
Jol-kólik oqıǵalarynyń kúrt ósýine júrgizýshilerdiń jyldamdyqty shamadan tys arttyryp, jol qozǵalysy erejelerin óreskel buzýy, sondaı-aq jolaýshylar men jaıaý júrginshilerdiń qaýipsizdik talaptaryn elemeýi sebep.
Polıtsııa derekterine súıensek, tek jyldamdyqty arttyrý deregi boıynsha 2025 jyldyń bes aıynda 85 JKO bolyp, 27 adam kóz jumǵan (2024 j. – 24 jol kólik oqıǵasy, 8 adam), jaraqat alǵandar sany 138 adamǵa jetken (2024 j. – 51).
Kelesi negizgi sebep – manevr jasaý erejelerin buzý. Mundaı jaǵdaılardan 33 jol apaty tirkelip, 3 adam qaza tapqan (2024 j. – 28 JKO, 2 adam), 44 adam jaraqat alǵan (2024 j. – 47).
Qarsy jolaqqa shyǵý saldarynan 13 jol apaty tirkelgen (2024 j. – sondaı kórsetkish), nátıjesinde 4 adam kóz jumyp (2024 j. – 15), 26 adam jaraqat alǵan (2024 j. – 21).
Jalpy, 2020-2025 jyldar aralyǵyndaǵy derekterge súıensek, óńirde 2022 jáne 2023 jyldary jol apatynan 140-tan astam adam kóz jumsa, 2024 jyly 1049 adam túrli jaraqat alǵan.
Jol apattarynyń aldyn alý úshin polıtsııa qyzmetkerleri birneshe profılaktıkalyq reıd uıymdastyryp, 10 200 quqyqbuzýshylyqtyń jolyn kesken. Sonymen qatar drondardyń kómegimen júrgizýshilerdiń tártip buzý derekteri tirkelip, 105 quqyqbuzýshylyq anyqtalǵan. Qazirgi tańda oblys joldarynda 16 dron turaqty túrde qoldanylyp jatyr.
Dron arqyly foto jáne beınebaqylaý júrgiziletini týraly 12 bılbord ornatylǵan. Onyń ishinde 5 – respýblıkalyq mańyzy bar jolda, 6 – oblystyq jolda, 1 – Tekeli qalasynda.
Jol qozǵalysy erejesin avtomatty túrde tirkeıtin «VIDAR SPEED-R» júıesimen jabdyqtalǵan 15 statsıonarlyq baqylaý beketi arqyly jyl basynan beri 42 301 quqyqbuzýshylyq tirkelgen.
Buǵan deıin, Jetisýda jyl basynan beri JKO boıynsha 203 qylmystyq is tirkelgenin jazǵanbyz.