Jetisý oblysynda jol apatynan 5 adam mert boldy
ASTANA. KAZINFORM — Ártúrli dárejedegi dene jaraqatyn alǵan 2 jolaýshy medıtsınalyq kómek kórsetý úshin aýrýhanaǵa jetkizildi, dep habarlaıdy Jetisý oblysy Polıtsııa departamentiniń baspasóz qyzmeti.
24 qańtar kúni shamamen saǵat 15:30–da Jetisý oblysy Aqsý aýdanynda «Kóshkental — Qapal» avtojolynyń 4-shaqyrymynda eki avtokóliktiń qatysýymen jol-kólik oqıǵasy boldy.
Aldyn ala málimetterge sáıkes, Toyota Avalon jáne Toyota Camry markaly avtokólikter soqtyǵysqan. Oqıǵa ornyna jedel túrde tergeý-jedel toby shyǵyp, alǵashqy tergeý áreketteri júrgizilýp jatyr.
— Jol-kólik oqıǵasy saldarynan 5 adam qaza tapty. Ártúrli dárejedegi dene jaraqatyn alǵan 2 jolaýshy medıtsınalyq kómek kórsetý úshin aýrýhanaǵa jetkizildi. Atalǵan fakti boıynsha qylmystyq is qozǵaldy. Qazir oqıǵanyń sebepteri men mán-jaılaryn anyqtaýǵa baǵyttalǵan sotqa deıingi tergep-tekserý júrgizilýde, barlyq nusqalar qarastyrylyp jatyr. Tergep-tekserý barysy Departament basshylyǵynyń baqylaýynda. Polıtsııa qaza tapqandardyń jaqyndary men týystaryna qaıǵyra kóńil aıtady, — delingen habarlamada.
Tártip saqshylary jol qozǵalysy erejelerin qatań saqtap, jyldamdyq rejımin buzbaı, araqashyqtyqty saqtaýǵa jáne jolda barynsha muqııat bolýǵa shaqyrady.
Osydan buryn Aqtaý qalasynan Beıneýge baǵyt alǵan avtobýs apatqa ushyrap, 4 adam mert bolǵanyn jazǵanbyz.