Jetisý oblysynda jyldamdyqty tirkeıtin jańa kameralar ornatyldy
TALDYQORǴAN. KAZINFORM – 27 sáýirden bastap Jetisý oblysynyń joldarynda jyldamdyqty asyrýdy tirkeıtin jańa kameralar jumys isteı bastaıdy. Olar birneshe aýdan men Tekeli qalasynda ornatyldy, dep habarlaıdy Kazinform agenttiginiń tilshisi.
Polıtsııanyń málimetinshe, jańa apparattyq-baǵdarlamalyq keshender «Ekin BOX SPOTTER» dep atalady. Olar Aqsý, Alakól, Eskeldi, Qaratal, Kerbulaq, Kóksý, Panfılov jáne Sarqan aýdandary aýmaǵyna ornalastyrylǵan. Ár aýdanda bes jyldamdyq ólshegish keshen iske qosylǵan.
Bul kameralar avtomatty rejimde jumys istep, jyldamdyqty asyrý faktilerin tirkeıdi.
Vedomstvonyń málimetinshe, respýblıkalyq jáne oblystyq mańyzy bar joldarda «ZEREK-2», «VIDAR SPEED-R», «Sergek» jáne «MERGEN» júıeleri de jumys isteıdi. Bul kameralar jyldamdyqty asyrýmen qatar qarsy jolaqqa shyǵý, jol tańbasyn saqtamaý sekildi ózge de quqyq buzýshylyqtardy anyqtaıdy.
Polıtsııa mundaı sharalar jol qozǵalysyna qatysýshylardyń ómiri men densaýlyǵyn saqtaý úshin qabyldanyp jatqanyn atap ótti.
– Júrgizýshilerdi jyldamdyq rejimin jáne jol qozǵalysy erejelerin saqtaýǵa shaqyramyz. Joldaǵy muqııattylyq pen jaýapkershilik adam ómirin saqtaýǵa kómektesedi, – dep málimdedi vedomstvo ókilderi.
Qazirgi tańda Jetisý oblysy aýmaǵynda quqyq buzýshylyqtardy tirkeıtin jáne beınebaqylaý júrgizetin 2356 kamera jumys isteıdi.
Aıta keteıik, Astanada beınebaqylaý kameralarynyń sany bir jylda eki esege artty.
