Jetisý oblysynda jyl bastalǵaly 200-ge jýyq sábı dúnıege keldi

TALDYQORǴAN. KAZINFORM — Jetisýda 1 apta ishinde 196 náreste dúnıege keldi. Onyń ishinde 4 egiz bar.

Jańa jyldyń bastalýymen oblys boıynsha 1-i men 7- shi qańtar aralyǵynda 196 bala ómirge keldi. Onyń 98- i ul, 98 — i qyz bala. Ana men bala densaýlyǵyn jaqsartý maqsatynda 2025 jyly oblystyq perınataldyq ortalyqta uryqty qorǵaý ortalyǵy bólimshesinde bir kúndik klınıka ashylyp, uryq hromosomalaryna ınvazıvti prenataldyq dıagnostıka (ÓSI), genetıkalyq zertteý júrgizýdi bastaý josparlanyp otyr. Ol hromosomalyq aýytqýlardy jáne basqa da tuqym qýalaıtyn buzylýlardy anyqtaý úshin qoldanylady.

— Sarqan qalasynda 16- shy qańtar kúni 3 jasqa deıingi balalarǵa arnalǵan Qamqorlyq ońaltý ortalyǵyn ashý josparlanýda, onda Alakól, Aqsý jáne Sarqan aýdandarynyń balalary ońaltýdan ótedi. Onda damýdyń erte kezeńderinde 3 aıdan 3 jasqa deıingi balalardy keshendi ońaltý júrgiziletin bolady, — dedi Jetisý oblystyq densaýlyq basqarmasy ókilderi.

Aıta keteıik bul ortalyqta neıro ortopedııalyq aýrýlary bar, onyń ishinde tserebraldy sal aýrýy bar balalardy ońaltýdyń úzdik álemdik ádistemeleri men zamanaýı tásilderi engiziletin bolady. Bólimshede mehanoterapııa, mantessorı, EDSh, tuz, shýngıt shahtalary, emmersııalyq vanna, korvıt, sensorlyq bólme, ıppoterapııa, psıholog, logoped jáne massajıst kabıneti qyzmetteri kórsetiledi. Dál osyndaı ońaltý ortalyǵy Taldyqorǵan qalasynda alty jastan 18 jasqa deıingi balalarǵa arnalǵan oblystyq balalar aýrýhanasynyń bazasynda ashylady.

Eske salaıyq, osyǵan deıin Taldyqorǵanda qaıtys bolǵan 2 dárigerdiń ólimine metapnevmovırýstyń qatysy joq ekenin jazǵanbyz.