Jetisý oblysynda jyl basynan beri 692 keli esirtki tárkilengen

TALDYQORǴAN. KAZINFORM — Ótken jylmen salystyrǵanda Jetisý oblysynda esirtki qylmysy 23 paıyzǵa tómendegen. Bul týraly oblystyq polıtsııa departamentiniń esirtki qylmysyna qarsy is-qımyl basqarmasy málimdedi.

Jyl basynan beri Jetisý oblysynda esirtki zattaryna baılanysty 145 quqyq buzýshylyq tirkeldi. Onyń ishinde 43 satý faktisi jáne asa ipi mólsherde esirtki saqtaýdyń 12 faktisi bar. Ótken jylmen salystyrǵanda esirtki qylmysy 23%-ǵa tómendegen.

— Jedel is-sharalar nátıjesinde 692 keli esirtki tárkilendi. Onyń 235 kelisi marıhýana, 66 kelisi sıntetıkalyk esirtki, 385 kelisi qarasora. Eki esirtki laboratorııasy joıylyp, 14 adam ustaldy. Onyń 5-eýi kámeletke tolmaǵan bala. Tergeý qortyndysy boıynsha sotqa 93 qylmystyq is jiberilip, 78 adam sottaldy, — deıdi Jetisý oblystyq polıtsııa departamentiniń esirtki qylmysyna qarsy is-qımyl basqarmasy bastyǵynyń orynbasary Emıl Sharmenov.

Aıta keteıik, oblys boıynsha esepte turǵan 230 nashaqor bar, olardyń basym kópshiligi 18-29 jas aralyǵyndaǵy jastar. Bir jyl ishinde statsıonarlyq emdeýden ótken 68 patsıenttiń 65-i erikti túrde júgingen.

Eske salaıyq, osyǵan deıin Tekelide qoldan jasalǵan ádispen esirtki zattaryn daıyndaǵandardyń 10 jylǵa sottalǵanyn jazǵanbyz.