Jetisý oblysynda jyl basynan beri 500-den astam jol apaty tirkeldi
ASTANA. KAZINFORM — Jetisý oblysynda bıyl jyl basynan beri 501 jol-kólik oqıǵasy tirkeldi. Jol apatynan kóz jumǵandar sany azaıǵanymen, zardap shekkenderdiń qatary artyp otyr.
Óńirde jol qozǵalysy qaýipsizdigin arttyrý maqsatynda joldardyń jaı-kúıine baqylaý kúsheıtilip, jol erejesin buzýdy tirkeıtin zamanaýı júıeler engizilip, avtojoldardy aýqymdy jóndeý jumystary jalǵasyp jatyr.
Ótken jyldyń osy kezeńimen salystyrǵanda óńirdegi jol apattarynyń sany 6,4%-ǵa azaıǵan. Byltyr osy ýaqytta 535 jol-kólik oqıǵasy tirkelgen.
Jetisý oblystyq polıtsııa departamentiniń jol-tehnıkalyq ınspektsııasy bóliminiń ınspektory Dıas Moldabergenovtiń aıtýynsha, jol apaty saldarynan 40 adam kóz jumǵan. Bul ótken jylǵy kórsetkishten 32,2%-ǵa az (59 adam). Al jaraqat alǵandar sany 848-den 856 adamǵa deıin ósken.
Jyl basynan beri polıtsııa qyzmetkerleri avtomobıl joldaryna 772 tekserý júrgizip, anyqtalǵan kemshilikterdi joıý jóninde jol uıymdaryna 773 nusqama joldaǵan. Joldardy talapqa saı kútip ustamaǵany úshin 129 mekeme men jaýapty tulǵa ákimshilik jaýapkershilikke tartyldy.
Jol qozǵalysy erejeleriniń saqtalýyn baqylaý zamanaýı tehnologııalardyń kómegimen de kúsheıtilip jatyr. Qazir oblys joldarynda 482 beınekamerany biriktiretin 97 avtomatty quqyqbuzýshylyqty tirkeý kesheni jumys isteıdi. Budan bólek, polıtsııanyń 13 qyzmettik kóligine Ekin Patrol jyldamdyqty ólsheıtin mobıldi keshenderi ornatylǵan. Al apat qaýpi joǵary ýchaskelerde áýeden baqylaý júrgizý úshin 16 dron paıdalanylady.
Sonymen qatar óńirde jol ınfraqurylymyn jańǵyrtý jumystary jalǵasyp jatyr.
«QazAvtoJol» AQ Jetisý oblystyq fılıalynyń dırektory Jasulan Qaltaevtyń málimetinshe, 2026 jyly respýblıkalyq mańyzy bar avtomobıl joldaryn jóndeýge jáne kútip ustaýǵa 27 mıllıard teńgeden astam qarjy bólingen.
— Búginde respýblıkalyq mańyzy bar joldardyń 92,1%-y jaqsy jaǵdaıda, 5,2%-y qanaǵattanarlyq kúıde. Al 2,7%-y jóndeýdi qajet etedi, — dedi ol.
Bıyl oblysta jalpy uzyndyǵy 136 shaqyrym avtojol jóndelmek. Onyń ishinde 28 shaqyrymy kúrdeli jóndeýden ótse, 108 shaqyrymynda ortasha jóndeý jumystary júrgiziledi. Sonymen qatar 1 022,2 shaqyrym joldy kútip ustaý jumystary josparlanǵan.
