Jetisý oblysynda jerasty esirtki zerthanasy joıyldy

ASTANA. KAZINFORM — Eskeldi aýdany aýmaǵynda júrgizilgen arnaıy operatsııa kezinde quqyq qorǵaý organdary jasyryn jáne muqııat jabdyqtalǵan jerasty zerthanasyn anyqtady, dep habarlaıdy Polisia.kz saıty.

Tergeý barysynda eki shetel azamaty men Astana qalasynyń turǵyny sıntetıkalyq esirtki óndirýmen aınalysqany belgili boldy.

— Tintý kezinde polıtsııa qyzmetkerleri kásibı zerthanalyq qural-jabdyqtardy, 6,4 keliden astam mefedron esirtki zatyn, sondaı-aq óndiristik maqsatta paıdalanylmaq bolǵan prekýrsorlardyń qaldyǵy bar 200 lıtrlik reaktordy tárkiledi. Kúdiktiler ustalyp, qamaýǵa alyndy. Taldyqorǵan qalasyndaǵy Jetisý oblysynyń mamandandyrylǵan sotynyń úkimimen úsheýi de kináli dep tanylyp, árqaısysy 16 jylǵa bas bostandyǵynan aıyryldy, — delingen habarlamada.

Polıtsııa, prokýratýra jáne Ulttyq qaýipsizdik komıteti departamentteriniń jedel is-qımylynyń nátıjesinde sıntetıkalyq esirtkiniń taralýyna tosqaýyl qoıylyp, júzdegen adam esirtki zulymdyǵynyń qurbany bolýdan aman qaldy. Polıtsııa turǵyndardy qoǵamdaǵy qaýipsizdikke beıjaı qaramaýǵa shaqyrady.

— Eger esirtkini paıdalaný, saqtaý nemese taratý faktileri týraly aqparat bilseńizder, dereý 102 nómirine nemese polıtsııanyń resmı áleýmettik jelilerindegi jeke habarlamalar arqyly habarlaýǵa bolady. Anonımdikke tolyq kepildik beriledi. Árbir derek — bir adam ómirin saqtap qalýǵa jáne qoǵamdy esirtki dertimen kúreste bir qadam alǵa jyljytýǵa múmkindik beredi, — dep eskertti vedomstvo.

Budan buryn SQO-da bıyl on fıtoesirtki zerthanasy joıylǵanyn jazǵanbyz.