Jetisý oblysynda apatqa ushyraǵan jedel járdem kóligindegi naýqastarǵa qatysty túsinikteme berildi

TALDYQORǴAN. KAZINFORM – Jetisý oblystyq densaýlyq saqtaý basqarmasy 2025 jylǵy 2 maýsymda Tekeli qalasynda jedel medıtsınalyq járdem kóligi qatysqan jol-kólik oqıǵasyna qatysty taraǵan aqparatqa baılanysty resmı túsinikteme taratty.

Vedomstvo málimetinshe, atalǵan kúni keshki ýaqytta «Kómek 103» qyzmetine 1938 jyly týǵan qarııaǵa qatysty shuǵyl shaqyrtý túsken. Naýqastyń jaǵdaıy negizgi aýrýynyń asqynýyna – ınsýlınge táýeldi qant dıabetiniń dekompensatsııalanǵan túrine baılanysty asa aýyr bolǵan.

Shaqyrtý ornyna dereý jedel járdem brıgadasy jiberilip, naýqas shuǵyl túrde jaqyn mańdaǵy medıtsınalyq mekemege jetkizilip jatqan kezde jol-kólik oqıǵasy oryn alǵan.

Oqıǵa ornyna shuǵyl túrde polıtsııa qyzmetkerleri men qosymsha jedel járdem brıgadalary jetip, alǵashqy medıtsınalyq kómek kórsetildi. Zardap shekkender Tekeli qalalyq aýrýhanasynyń qabyldaý bólimine jetkizildi. 1938 jyly týǵan naýqas aýyr jaǵdaıda jansaqtaý bólimine jatqyzyldy. Dárigerlerdiń barlyq reanımatsııalyq sharalaryna qaramastan, 22:40-ta onyń bıologııalyq ólimi tirkeldi.

Basqarmanyń málimdeýinshe, naýqastyń qaıtys bolýyna jol apatynda alǵan jaraqattar emes, burynnan kele jatqan sozylmaly aýrýynyń asqynýy sebep bolǵan.

Jol apatynan zardap shekken ózge azamattar da aýrýhanaǵa jetkizildi. Olardyń jaǵdaıy – ortasha aýyr, turaqty. Bir naýqas alǵashqy kómek kórsetilgennen keıin ambýlatorııalyq em alýǵa jiberildi. Barlyq zardap shekkender qajetti medıtsınalyq kómekpen tolyq qamtylǵan.

Atalǵan fakti boıynsha qylmystyq is qozǵalyp, tıisti protsessýaldyq sharalar qabyldanyp jatyr. Іs quqyq qorǵaý organdarynyń baqylaýynda.

Jetisý oblystyq densaýlyq saqtaý basqarmasy jaǵdaıdy óz baqylaýynda ustap otyr.

Buǵan deıin, Almatyda jedel járdem kóligine jol bermegen júrgizýshi jaýapqa tartylǵany týraly jazǵanbyz.