Jetisý oblysynda jasóspirimder jasyryn dinı sabaqtarǵa tartylǵan
ASTANA. KAZINFORM — Jetisý óńiriniń tártip saqshylary jasóspirimderge zańsyz dinı sabaqtar júrgizilgenin anyqtady.
«Ýchaske» jedel-profılaktıkalyq is-sharasy barysynda Jetisý oblystyq polıtsııa departamentiniń ekstremızmge qarsy kúres basqarmasynyń qyzmetkerleri Ulttyq qaýipsizdik komıteti men oblystyq prokýratýranyń kómegimen jasóspirimderdi tirkelmegen dinı uıymnyń ıdeologııasyna zańsyz úıretýdiń jolyn kesti.
Oblystyq polıtseıler jataqhana retinde paıdalanylǵan úı-jaılardy tekserý barysynda sheteldik dinı ádebıetter men oqý materıaldary tabylǵanyn habarlady.
Uıymdastyrýshylardyń buǵan deıin qaıyrymdylyq mekemeleri men balalar ınternaty atyn jamylyp, zańsyz dinı sabaqtar júrgizgeni anyqtaldy.
Aıta keteıik, bıyl naýryz aıynda Taldyqorǵan qalalyq sotynyń qaýlysymen atalǵan jalǵan qaıyrymdylyq mekemeleri kúshtep joıylǵan bolatyn.
Tergeý nátıjesinde:
- dinı rásimderdi uıymdastyrýshy kámeletke tolmaǵandardy dinı qyzmetke zańsyz tartqany úshin ákimshilik jaýapkershilikke tartyldy;
- tirkeýsiz turǵany úshin tórt «ustaz» (tálimger) ákimshilik jaýapkershilikke tartyldy;
- kámeletke tolmaǵandardyń ata-analary bala tárbıeleý jónindegi mindetterin oryndamaǵany úshin ákimshilik jaýapkershilikke tartyldy;
- bir kámeletke tolmaǵan bala ata-anasynyń basqa óńirde turýyna baılanysty Beıimdeý ortalyǵyna jiberildi.
— Qazirgi ýaqytta boljamdy uıymdastyrýshylardyń qyzmetine qatysty tergeý amaldary júrgizilip jatyr. Onyń qorytyndysy boıynsha qoldanystaǵy zańnamaǵa sáıkes protsessýaldyq sheshim qabyldanatyn bolady, — deıdi vedomstvo.
Eske salaıyq, elordada ulttyq jáne dinı alaýyzdyqty qozdyrǵan 11 azamat sottaldy.