Jetisý oblysynda jasóspirim qyzdyń ıntım materıaldaryn taratqan turǵyn ustaldy
ASTANA. KAZINFORM — Jetisý oblysynyń turǵyny kámeletke tolmaǵan qyzdyń ıntımdik sıpattaǵy materıaldaryn zańsyz taratqany úshin ustaldy.
Jetisý oblysy polıtsııa departamentiniń kıberqylmysqa qarsy — is-qımyl basqarmasynyń qyzmetkerleri Qazaqstan Respýblıkasy Іshki ister mınıstrliginiń kıberqylmysqa qarsy is-qımyl departamentimen birlesip jáne «Jańa adamdar» jastar qozǵalysy ókilderiniń qoldaýymen ıntımdik sıpattaǵy materıaldardy zańsyz taratý deregin anyqtady.
Jedel-izdestirý is-sharalary barysynda polıtseıler kúdiktiniń jeke basyn anyqtady. Ol Alakól aýdanynyń 22 jastaǵy turǵyny bolyp shyqty.
Tergeý málimetinshe, kúdikti TikTok áleýmettik jelisi arqyly kámeletke tolmaǵan qyzben tanysyp, keıin baılanysyn messendjerlerdiń biri arqyly jalǵastyrǵan.
— Qyzdyń senimine kirgen ol psıhologııalyq qysym kórsetip, qorqytyp, sondaı-aq 20 myń teńge kóleminde aqshalaı syıaqy beremin dep ýáde etip, odan ıntımdik sıpattaǵy fotosýretter men beınematerıaldardy alǵan. Keıin kúdikti atalǵan beınematerıaldardy messendjerlerdiń birindegi jabyq arnalar arqyly zańsyz taratyp, odan materıaldyq paıda tapqan, — dep habarlady Іshki ister mınıstrligi.
Kúdikti ustalyp, ýaqytsha ustaý ızolıatoryna qamaldy. Qazirgi ýaqytta qajetti tergeý áreketteri júrgizilip, sonymen qatar onyń osyǵan uqsas basqa da qylmystarǵa qatysy bar-joǵy tekserilip jatyr.
Polıtsııa ata-analardy balalardyń ınternet keńistigindegi qaýipsizdigine erekshe kóńil bólýge úndedi.
— Kámeletke tolmaǵandarǵa áleýmettik jelilerde qaýipsiz qarym-qatynas jasaý qaǵıdalaryn túsindirip, beıtanys adamdarmen baılanysýdyń qaýipti ekenin jáne eshbir jaǵdaıda jeke fotosýretteri men beınematerıaldaryn bógde adamdarǵa jibermeý qajettigin únemi eskertip otyrǵan jón. Eger siz nemese balalaryńyz ınternet arqyly bopsalaý, qorqytý, aqsha talap etý nemese jeke derekterdiń zańsyz taratylýy sııaqty jaǵdaılarǵa tap bolsa, dereý polıtsııaǵa habarlasyńyzdar. Ýaqtyly berilgen aqparat quqyq buzýshylardy jedel anyqtaýǵa jáne osyndaı qylmystardyń aldyn alýǵa múmkindik beredi, — delingen habarlamada.
Eske salaıyq, buǵan deıin Astana qalasy prokýratýra basqarmasynyń prokýrory Saıahat Sultanov ınternet arqyly bopsalaý jıi bolatynyn jáne qysym kórsetýshiler jábir kórýshilerden mıllıondaǵan aqsha talap etetinin aıtqan edi.
