Jetisý oblysynda janýar qaldyqtary tabylǵan qaýipti qoqys polıgony anyqtaldy
ASTANA. KAZINFORM – Jetisý oblysy Kerbulaq aýdany Kóksý aýyldyq okrýgindegi qatty turmystyq qaldyqtar polıgonynyń sanıtarııalyq jaǵdaıyna qatysty áleýmettik jelilerde alańdaýshylyq týdyrǵan aqparat tarady.
Másele jergilikti turǵynnyń beıneúndeýinen keıin kóterilgen. Onyń aıtýynsha, qoqys polıgonynda turmystyq qaldyqtarmen birge iri qara mal men basqa da janýarlardyń shirip jatqan qaldyqtary anyqtalǵan.
Mundaı jaǵdaı sanıtarııalyq-epıdemıologııalyq qaýipsizdikke eleýli qater tóndiredi.
Sarapshylardyń pikirinshe, bıologııalyq qaldyqtardyń ashyq jerde ydyraýy juqpaly aýrýlardyń taralýyna sebep bolýy múmkin. Sonymen qatar polıgon aýmaǵyna qańǵybas janýarlar men jándikterdiń jınalýy ınfektsııalardyń aýa, topyraq jáne sý arqyly taralý qaýpin arttyrady.
Budan bólek, qoqys arasynda byqsyp janý oshaqtary tirkelgen. Bul órt shyǵý qaýpin kúsheıtip, atmosferaǵa zııandy zattardyń bólinýine ákelýi yqtımal.
Atalǵan jaǵdaıǵa Kóksý aýyldyq okrýginiń ákimdigi túsinikteme berdi.
– Qatty turmystyq qaldyqtardy shyǵarý qyzmetin memlekettik satyp alý qorytyndysy boıynsha «Saryózek Resaıklıng» JShS júzege asyrady. Kompanııamen 2026 jylǵy 17 naýryzda kelisimshart jasalǵan, – dep málimdedi ákimdikte.
Sonymen birge ákimdik ókilderi qazirgi ýaqytqa deıin merdiger tarapynan polıgonda sanıtarııalyq tazalaý jumystary júrgizilmegenin moıyndady. Kompanııaǵa tıisti eskertý joldanyp, jaqyn arada tazalaý jumystary bastalatyny aıtyldy.
Jergilikti bılik ókilderi jaǵdaı baqylaýda ekenin jetkizdi.
Aıta keteıik, buǵan deıin Mańǵystaý oblysynda dala qoqysqa tolyp ketkeni týraly da habarlanǵan bolatyn.
