Jetisý oblysynda jańǵyrtylǵan alǵashqy temirjol vokzaly ashyldy
ASTANA. KAZINFORM — Taldyqorǵan qalasynda jańǵyrtý jumystary aıaqtalǵannan keıin temirjol vokzalynyń saltanatty ashylý rásimi ótti. Bul – Memleket basshysynyń tapsyrmasymen júzege asyrylyp jatqan el boıynsha 124 temirjol vokzalyn rekonstrýktsııalaý jáne jańǵyrtý jónindegi aýqymdy baǵdarlama aıasynda jańartylǵan Jetisý oblysyndaǵy alǵashqy nysan. Bul týraly Kólik mınıstrligi málim etti.
— Jańǵyrtý barysynda jolaýshylardyń jaılylyǵy men qaýipsizdigin arttyrýǵa baǵyttalǵan keshendi qurylys-montaj jumystary júrgizildi. Ǵımarattyń qasbeti men ishki úı-jaılary jóndelip, ınjenerlik jeliler, jylý, sýmen jabdyqtaý jáne elektrmen qamtý júıeleri jańartyldy. Sonymen qatar zamanaýı kútý zaldary jabdyqtalyp, navıgatsııa júıesi jetildirildi jáne múmkindigi shekteýli azamattar úshin qolaıly jaǵdaılar jasaldy, — delingen habarlamada.
Taldyqorǵan temirjol vokzaly el óńirlerimen jolaýshylar qatynasyn qamtamasyz etetin Jetisý oblysynyń mańyzdy kólik nysany bolyp tabylady. Jobany iske asyrý jolaýshylarǵa qyzmet kórsetý sapasyn arttyrýǵa jáne vokzalda qolaıly ári zamanaýı jaǵdaı jasaýǵa múmkindik beredi.
Aıta keteıik, temirjol vokzaldaryn jańǵyrtý baǵdarlamasy táýelsiz Qazaqstan tarıhyndaǵy eń iri ınfraqurylymdyq jobalardyń biri bolyp tabylady. El tarıhynda alǵash ret temirjol ınfraqurylymynyń 120-dan astam nysanynda qurylys-montaj jumystary bir mezgilde júrgizilip jatyr.
Aıta keteıik, Qazaqstanda 124 vokzal jańǵyrtylyp jatyr.
