Jetisý oblysynda jańa usynystar men ózgerister talqylandy

ASTANA. KAZINFORM - Aldaǵy salyq-bıýdjettik reformalarǵa daıyndyq aıasynda Qarjy vıtse-mınıstri Dáýren Temirbekov pen Ulttyq ekonomıka mınıstrligi Salyq jáne keden saıasaty departamentiniń dırektory Erlan Saǵynaev bastaǵan bıznes-qoǵamdastyqpen talqylaý úshin qurylǵan jumys toby Jetisý oblysynda kezdesý ótkizdi.

Jergilikti atqarýshy organdar, máslıhattar jáne oblystyń Kásipkerler palatasy ókilderi qatysqan kezdesýde talqylaýdyń negizgi taqyryby salyq zańnamasyndaǵy ózgerister boldy. Qatysýshylar QQS mólsherlemesin 16%-ǵa deıin kóterý jáne birqatar basym sala úshin tómendetilgen mólsherlemeni 10%-ǵa engizý týraly usynysty qarastyrdy. Sondaı-aq aýyl sharýashylyǵy taýaryn óndirýshilerdi salyqtan bosatý jáne QQS boıynsha tirkeý shegin 15 mln teńgege deıin tómendetý máselesi talqylandy.

Jıynǵa qatysýshy kásipkerler usynylǵan ózgeristerdi, ásirese QQS mólsherlemesin kóterýdi belsendi túrde talqylady. Olar tıimdi salyq saıasatyn qalyptastyrý úshin ári qaraı dıalog qajet ekenin atap ótip, túpkilikti sheshim qabyldaý kezinde olardyń pikirlerin eskerýge shaqyrdy.

Máselen, «Biriksek – kúshpiz» kásipkerler qaýymdastyǵynyń basshysy Edil Qazaqbaev sheshim qabyldaýda salmaqty kózqarastyń mańyzdylyǵyn atap ótti. Onyń aıtýynsha, memleket pen kásipkerler arasyndaǵy syndarly dıalog elimizde qolaıly bıznes orta qalyptastyrýǵa múmkindik beredi.

Tutynýshylardyń quqyqtaryn qorǵaý jáne sybaılas jemqorlyqqa qarsy is-qımyl jónindegi keńestiń tóraǵasy Banııamın Faızýllın memlekettiń bıýdjettik saıasatyndaǵy aldaǵy ózgeristerdi shaǵyn jáne orta bıznes ókilderimen jan-jaqty talqylaý qajet ekenin basa aıtty.

Jalpy, kezdesýge qatysýshylar júrgizilip jatqan salyq reformasy ınfraqurylymdy jańǵyrtýǵa qajetti resýrstarmen qamtamasyz etýdiń negizgi quraly retinde qarastyrylatynyn atap ótti. Kásipkerler reformalardy iske asyrý barysynda memlekettik organdarmen syndarly yntymaqtastyqqa úmit bildirdi.