Jetisý oblysynda zańsyz et tasymaldaý derekteri anyqtaldy

ASTANA. KAZINFORM – Jetisý oblysynda polıtseıler zańsyz et tasymaldaý faktilerin anyqtaý boıynsha tekseris júrgizýde, dep habarlaıdy Polisia.kz.

Óńir aýmaǵynda «Mal urlyǵy» respýblıkalyq jedel aldyn alý is-sharasy ótip jatyr. Onyń maqsaty – mal urlyǵyna baılanysty qylmystardyń aldyn alý, olardy ashý jáne et pen et ónimderin tasymaldaý men satý kezinde quqyq buzýshylyqtardy anyqtaý.

Bar bolǵany eki kúnniń ishinde polıtseıler mal urlyǵyna qatysty eki qylmystyq isti tirkep, buǵan deıin ashylmaǵan tórt qylmysty áshkereledi. Bul nátıjeler is-sharanyń tıimdiligin kórsetip, tártip saqshylarynyń aýyl turǵyndary men sharýa qojalyqtarynyń múddesin qorǵaýǵa jaýapkershilikpen qaraıtynyn dáleldeıdi.

Profılaktıkalyq is-shara aıasynda et jáne et ónimderi satylatyn 69 nysan men et tasymaldaǵan 83 kólik tekserildi. Sonyń nátıjesinde tıisti qujattarsyz ónim tasymaldaýdyń bes deregi jáne veterınarııalyq erejelerdi buzýdyń 43 jaǵdaıy anyqtaldy.

Budan bólek, polıtsııa qyzmetkerleri 138 sharýa qojalyǵyn tekserdi. Solardyń biri – Maqanshy – Almaty baǵytyndaǵy tasjolda toqtatylǵan jolaýshylar avtobýsy. Kólik Abaı oblysynan shyqqan. Tekserý kezinde júk bóliminen 100 usaq jáne 2 iri qara maldyń eti tabyldy. Júrgizýshi etti Almaty qalasyndaǵy bazarlardyń birine jetkizýge alǵanyn aıtqan.

Atalǵan derek boıynsha materıal veterınarııalyq ınspektsııaǵa joldandy.

Polıtseıler «Mal urlyǵy» is-sharasy aıasynda tekseristerdi jalǵastyryp, azamattardy et jáne et ónimderin tasymaldaý men satý kezinde zań talaptaryn qatań saqtaýǵa, sondaı-aq mal urlyǵyna qatysty kúmándi jaǵdaılar týraly polıtsııaǵa dereý habarlaýǵa shaqyrady.

Aıta keteıik, bıyl Ulytaý oblysy aýmaǵynda mal urlyǵy 30%-ǵa tómendegen.