Jetisý oblysynda zańsyz aktıvter esebinen jańa mektep salynady
TALDYQORǴAN. KAZINFORM – Búgin Tekeli qalasy Rýdnıchnyı aýylynda jańa mekteptiń kapsýlasyn salý rásimi atqarylyp, saltanatty sharaǵa Qazaqstan Respýblıkasynyń Bas prokýrory Berik Asylov, oblys ákimi Beıbit Isabaev jáne aýyl turǵyndary qatysty. Bul týraly óńirlik ákimdik málim etti.
Aldymen sóz alǵan Bas prokýror Berik Asylov elden zańsyz shyǵarylǵan aktıvter esebinen mektep salý isi Memleket basshysynyń bastamasymen qolǵa alynǵan eldegi jańa reformalardyń nátıjesi ekenin tilge tıek etti.
— Memleket basshysy Qasym-Jomart Kemeluly Toqaevtyń tapsyrmasy boıynsha qaıtarylǵan aktıvter qoǵam ıgiligine jumsalmaq. Atap atqanda, memleket úshin mańyzdy jobalar — mektep, balabaqsha, aýrýhana, sport keshenderi, mádenı ortalyqtar, jáne áleýmettik nysandar salynyp jatyr. Sol arqyly birqatar másele sheshimin tabýda. 1,5 jylda Elimizden zańsyz shyǵarylǵan aktıvterdi qaıtarý jónindegi komıtet 1,2 trln teńgeden astam qarajatty qaıtarý boıynsha shara qabyldady, onyń 785 mlrd teńgesi memleketke qaıtaryldy, — dedi bas prokýror.
Munan soń kópshilikti ıgi qýanyshpen oblys ákimi Beıbit Isabaev quttyqtady:
— Memleket basshysynyń ózi aýyl oqýshylarynyń bilim deńgeıin kóterýge erekshe kóńil bólip, oqý-aǵartý salasyn damytý, bilim mekemelerin zamanaýı quraldarmen jabdyqtaý, aýyl muǵalimderiniń quzyrettiligin arttyrý baǵytynda aldymyzǵa úlken mindetter qoıyp otyr. Bul rette aýyldyq jerlerdegi mektepterdiń bilim sapasyn arttyrý óte mańyzdy. Kirpishi qalanyp jatqan mektep — bolashaqta oblysymyzdaǵy kórnekti bilim ordalarynyń qatarynda bolatynyna senemiz, — dedi óńir basshysy.
Tekeli qalasynyń ardagerler keńesiniń tóraǵasy Ertaı Dúısebaev aýyl turǵyndarynyń atynan rızashylyq bildirdi.
Budan soń mektep kapsýlasyn salý rásimi atqaryldy.
Jalpy Rýdnıchnyı aýylyndaǵy № 7 orta mekteptiń ǵımaraty 1970 jyly salynǵan bolatyn. Munda 148 oqýshy bilim alsa, mektepke deıingi shaǵyn ortalyqta — 30, mektepke deıingi oqytý men tárbıe tobynda 26 bala bar. Olarǵa 40 pedagog bilim men tárbıe berip otyr.
Tozyǵy jetken mektep ǵımaraty Arnaýly memlekettik qor qarajaty esebinen bıyl jańadan salyna bastady. Eski mekteptiń ornyna 30 oryndyq shaǵyn ortalyǵy bar 200 oryndyq jańa mekteptiń qurylys jumystary júrip jatyr. Qurylys alańyna jumysqa jergilikti turǵyndar tartylǵan. Qurylys kestege sáıkes júrgizilip jatyr. Josparǵa sáıkes kelesi jyldyń qańtar aıynda salynyp bitýi tıis.
Qurylystyń bitkenin oqýshylar da, ata-analar da asyǵa kútedi.
— Osy aýyldyń jergilikti turǵynymyz. Buryn basqa jańa mektepterge qarap, qyzyǵyp júretinbiz. Meniń 3 ulym mektepte oqıdy. Jańa mektep salyna bastaǵanyn kórgende qýandyq. Іshinde sońǵy úlgidegi quraldary, ınteraktıvti taqtasy bolsa, balalar zamanǵa saı bilim alady, jańa mektep balalarymyz úshin bilimniń altyn uıasy bolady dep oılaımyz, — deıdi Rýdnıchnyı aýylynyń turǵyny, ata ana Ǵalııa Ermekqyzy.
Atap ótsek, Arnaýly memlekettik qor qarajaty esebinen oblysta taǵy bir bilim nysanyna — Kerbulaq aýdany Kóksaı aýylyndaǵy orta mekteptiń qurylysyna qarjy bólinip, qurylys jumystary qarqyndy júrip jatyr. Kelesi jylǵa atalǵan qor qarajatyna taǵy 5 mekteptiń qurylysyn júrgizýge ótinim berildi.
Jalpy Jetisý oblysy boıynsha memleketke prokýratýra organdarynyń jumysy nátıjesinde qaıtarylǵan aktıvter esebinen 22 áleýmettik joba iske asyrylyp jatyr.
Aıta keteıik, Jetisý oblysynda segiz jańa sý qoımasy salynbaqshy.