Jetisý oblysynda zamanaýı akkýmýlıator zaýyty iske qosylyp, 180 jańa jumys orny ashyldy
ASTANA. KAZINFORM – Jetisý oblysyna jumys sapary aıasynda Májilis depýtaty, «Aq jol» partııasy fraktsııasynyń jetekshisi Azat Perýashev jaqynda Taldyqorǵanda ashylǵan «ASMA Industrial» zamanaýı óndiristik akkýmýlıator zaýytynyń tynys-tirshiligimen tanysty.
Bul zaýyt — atalǵan oblys úshin mańyzdy ınvestıtsııalyq joba. Oǵan 3 mlrd teńgeden astam qarjy quıylyp, 180 jańa jumys orny ashyldy. Kásiporynda elektr tehnıkasy, energetıka, telekommýnıkatsııa, jańartylatyn energııa kózderinde elektr qýatyn jınaqtaý úshin paıdalanylatyn akkýmýlıatorlar óndiriledi. Olar avtokólikter men teplovoz qozǵaltqyshtaryn iske qosýǵa, negizgi jáne qosalqy qýat kózi retinde de qoldanylady.
— Biz jańa tehnologııalardy qoldaýymyz kerek. Eger zamanaýı talaptarǵa saı memleket bolǵymyz kelse, ekonomıkalyq jobalardy júzege asyryp, osyndaı zaýyttardy iske qosý asa mańyzdy. Mundaı óndirister elimiz úshin óte qajet, — dedi Azat Perýashev.
Kásiporyndy aralaý barysynda depýtat shıkizat jetkizý, salyq salý jáne basqa da birqatar máselege nazar aýdardy. Zaýyttyń bas dırektory Serikbaı Ájmaǵanbetov bul baǵytta eshqandaı túıtkil joq ekenin, shıkizat jetkizý ýaqtyly júzege asyrylyp otyrǵanyn aıtty.
Aldaǵy ýaqytta kásiporyn jylyna 210 myń danaǵa deıin ónim shyǵarýdy josparlap otyr. Sonymen qatar zaýytty keńeıtý jumysy júrgizilýde, bul óndiris kólemin jylyna 300 myń danaǵa deıin arttyrýǵa múmkindik beredi. Mundaı kórsetkishi bar zaýyttar TMD boıynsha tek Qazaqstan men Reseıde ǵana jumys isteıdi. Óndiristik qýatty arttyrý úshin zaýyt aýmaǵynda qosymsha korpýs salynady. Bul ónim shyǵarý kólemin ulǵaıtyp, kásiporynnyń naryqtaǵy pozıtsııasyn nyǵaıtýǵa yqpal etetin bolady.
Aıta ketelik Májilis depýtaty Ulytaýdaǵy joldardyń sapasyn teksergen edi.