Jetisý oblysynda vzvod komandıri sarbazdy oryndyqpen urǵan: is qaıta tergelip jatyr
ASTANA. KAZINFORM — Jetisý oblysynda bolǵan merzimdi áskerı qyzmettegi sarbaz men vzvod komandırine qatysty qylmystyq is qaıta qozǵaldy. Ol qyzmettik ókilettigin asyra paıdalandy degen kúdikke ilingen. Bul týraly Kazinform agenttiginiń tilshisi habarlady.
Áleýmettik jelilerde taraǵan aqparatqa sáıkes, 20 jastaǵy Ramazan Tergeýbaev Qazaqstan Qarýly kúshter qataryna 2025 jylǵy kóktemgi áskerge shaqyrý naýqanynda alynǵan. Oqıǵa 19 qańtar kúni keshke Eskeldi aýdanyndaǵy Qarabulaq aýylynda ornalasqan №18386 áskerı bólimniń kazarmasynda bolǵan.
Habarlamada aıtylǵandaı, kún tártibiniń saqtalýyn baqylaýǵa jaýapty bolǵan aǵa leıtenant O. sarbazdy basynan oryndyqpen urǵan. Buǵan sarbazdyń beketke kúrtesiniń túımesin salmaı júgirip kelgeni sebep bolǵan. Bul áskerı kıim tártibin buzý retinde baǵalanǵan.
Sot-medıtsınalyq saraptama Ramazan Tergeýbaevtyń mańdaı tusynan soǵylǵan jaraqat alǵanyn anyqtady. Jaraqattyń doǵal qatty zattyń áserinen paıda bolǵany aıtylǵan.
Atalǵan derek boıynsha 25 jastaǵy ofıtserge qatysty Qazaqstan Respýblıkasynyń Qylmystyq kodeksiniń 451-baby 1-bóligi («Bastyqtyń bılikti nemese qyzmettik ókilettikterdi asyra paıdalanýy») boıynsha qylmystyq is qozǵalǵan.
Keıin jábirlenýshi taraptardyń tatýlasýyna baılanysty isti toqtatý týraly ótinish berip, 9 aqpanda tergeý negizsiz toqtatylǵan.
Alaıda sarbazdyń anasy Taldyqorǵan qalasyndaǵy ońtústik óńirlik áskerı-tergeý basqarmasyna shaǵym túsirip, isti qaıta qaraýdy talap etken. Ol sondaı-aq sol áskerı bólimde qyzmetin jalǵastyryp jatqan ulynyń qaýipsizdigin qamtamasyz etýdi suraǵan.
Anasynyń aıtýynsha, oqıǵadan keıin áskerı bólim basshylyǵy oǵan uly qulap qalyp, basyn ústelge soǵyp alǵanyn aıtqan.
— Oqıǵadan birneshe kún ótken soń maǵan bólim komandıriniń orynbasary men rota komandıri keldi. Olar ulym jaı ǵana qulap, basyn soǵyp alǵanyn aıtty. Men sol kezde olarǵa sendim. Keıin basqa sarbazdardyń ata-analarynan bul is boıynsha qylmystyq is qozǵalǵanyn bildim, — dedi áskerı qyzmetkerdiń anasy.
Qazaqstan Respýblıkasynyń Qorǵanys mınıstrligi málimetinshe, atalǵan oqıǵa boıynsha sotqa deıingi tergeý júrgizilip jatyr.
Vedomstvonyń habarlaýynsha, buǵan deıin qylmystyq is jábirlenýshiniń tatýlasý týraly ótinishi negizinde toqtatylǵan. Alaıda jańa mán-jaılardyń paıda bolýyna baılanysty áskerı-tergeý basqarmasy isti qaıta jandandyrǵan.
Qazirgi ýaqytta qajetti tergeý áreketteri júrgizilip jatyr.
Sondaı-aq mınıstrlik qyzmettik tekseris nátıjesinde birneshe laýazymdy tulǵa tártiptik jaýapkershilikke tartylǵanyn málimdedi.
Atap aıtqanda, qyzmetti uıymdastyrýdy jetkilikti baqylamaǵany úshin áskerı bólim komandıri, onyń tárbıe jáne ıdeologııalyq jumys jónindegi orynbasary, rota komandıri jáne taǵy birqatar laýazymdy tulǵa tártiptik jaýapkershilikke tartylǵan.
Mınıstrlik Qarýly kúshterde kez kelgen zorlyq-zombylyq pen qyzmettik ókilettikti asyra paıdalaný áreketterine jol berilmeıtinin atap ótti. Oqıǵaǵa qatysýshylardyń áreketine sońǵy quqyqtyq baǵa sotqa deıingi tergeý aıaqtalǵannan keıin beriledi.
Buǵan deıin Gvardeısk garnızonyndaǵy áskerı bólimderdiń birinde merzimdi áskerı qyzmettegi sarbazǵa dene jaraqatyn keltirý faktisi boıynsha da qylmystyq is qozǵalǵany habarlanǵan.
Eske sala keteıik, buǵan deıin Otardaǵy áskerı bólimde sarbaz soqqyǵa jyǵylyp, jaǵy synǵan bolatyn.
