Jetisý oblysynda uıaly telefon ustamaıtyn 20 aýyl bar

Jetisý oblysynda 352 aýyldyq eldi meken bar. Mundaǵy turǵyndar egin egip, mal basyn kóbeıtip otyr. Alaıda osy aýyldardaǵy ınternet baılanysynyń nasharlyǵy adamdardy alańdatady, dep habarlaıdy Kazinform.

Esep boıynsha, atalǵan 352 aýyldyń ishinde 287 eldi meken mobıldi ınternet jelisimen qamtylǵan.

Al 65 aýylda ǵalamtorǵa qosylý múmkindigi tómen bolsa, 20 eldi mekende uıaly baılanys múldem joq eken.

Uıaly baılanys operatorlarynyń dereginshe, mobıldi ınternetpen qamtylǵan aýyldardyń ózinde sapa nashar.

Baılanys kúıi 135 aýylda 4G deńgeıinde bolsa, qalǵan turǵyndar 3G deńgeıindegi ınternetti qanaǵat qylyp otyr.

Ǵalamtor jyldamdyǵy alys aýyldardy bylaı qoıǵanda, oblys ortalyǵyna jaqyn eldi mekenderde de máz bolmaı tur.

Máselen, Taldyqorǵan qalasynan 15 shaqyrym jerdegi Abaı aýylynyń turǵyndary ınternetke qosylý úshin bıik tóbe basyna shyǵýǵa májbúr.

Ásirese, mektep oqýshylary men muǵalimder qınalyp júr.

«Eskeldi aýdanyna qarasty Abaı aýyly Karabulaq kentinen 5 shaqyrym ǵana qashyqtyqta ornalasqan. Internet jáne mobıldi baı­lanys nashar. Byltyr aýylǵa ákimdik qara­jat bólip, 50 dana „Transtelekomnyń“ Wi-Fi jelisin tegin qoıyp bergen. Sodan toqtap qaldy. Endi bul jelige qosylý úshin 50 myń teńge surap otyr, muny aýyl turǵyndarynyń qaltasy kótermeıdi. Mobıldi telefon baılanysy túzelse, ǵalamtor bárimizge qol jetimdi bolar edi», — deıdi Eskeldi aýdany Abaı aýylynyń turǵyny Alma Esbolǵanova.