Jetisý oblysynda úsh jylda 188 aýyldyń kósheleri jóndeldi

ASTANA. KAZINFORM – Jetisý oblysynda sońǵy úsh jylda 188 aýyldyń ishindegi kósheler jóndeldi. Sonymen birge, óńirdegi respýblıkalyq mańyzy bar joldar tolyǵymen jańǵyrtyldy. Bul týraly Jetisý oblysynyń ákimi Beıbit Isabaev aıtyp berdi.

Óńir basshysynyń aıtýynsha, 2024 jyly respýblıkalyq mańyzy bar «Taldyqorǵan-Úsharal» jáne «Úsharal-Dostyq» joldary tolyq jańartyldy. «Saryózek-Qorǵas» baǵytyndaǵy jol bıyl tolyq jóndeýden ótti.

– 2023-2025 jyldary jergilikti mańyzy bar 1 138 shaqyrymnan astam jol jóndeldi. Oblystyq mańyzy bar joldardyń jaqsy jáne qanaǵattanarlyq jaǵdaıdaǵy úlesi 95%-ǵa jetti. Molaly aınalmasynan Balqash kóline deıingi jol bıyl jańǵyrtýdan keıin ashyldy. Jol jıegin abattandyrý jumystaryn jyl sońyna deıin aıaqtap, nysandy kelesi jyly qabyldap alamyz, – dedi B. Isabaev Ortalyq kommýnıkatsııalar qyzmetinde tilshilerge bergen suhbatynda.

Al byltyr Balqash kóline deıin «Úshtóbe-Kópbirlik» avtomobıl joly tolyq jóndelip, paıdalanýǵa berildi. 2026 jyly «Taldyqorǵan – Úshtóbe» jolyna jóndeý jumystary júrgiziledi.

Aıta keteıik, Jetisý oblysynda ortalyq sý júıesimen qamtý 99,9%-ǵa jetti, gazdandyrý deńgeıi jyl sońyna deıin 72% bolady.

Sondaı-aq, Jetisýda apatty nemese úsh aýysymdy mektep joq.