Jetisý oblysynda týrızmdi damytý basqarmasy qurylady
TALDYQORǴAN. KAZINFORM — Jetisý oblysynyń týrızmi bes negizgi týrıstik baǵytqa negizdelgen. Olar — Alakól men Balqash kólderi, «Altynemel», «Jońǵar Alataýy» ulttyq tabıǵı parkteri jáne Jońǵar Alataýy taýly jotasy, dep habarlaıdy Kazinform agenttiginiń tilshisi.
— Bıyl týrızm salasyna bólingen qarajat oblystyń damý bıýdjetiniń 30 paıyzyn quraıdy. Osy arqyly týrıstik nysandardyń qoljetimdilik máseleleri sheshilýde. Eń aldymen bul — jol, sý, jaryq máseleleri. Alakólge baratyn joldyń qaıta jańǵyrtý jumystary aıaqtaldy, Balqashqa jol qatynasy qamtamasyz etildi. Kelesi jyly joldy tolyq tapsyrý josparlanǵan. Jasylkól kóline baratyn joldyń jóndeý jumystary aıaqtalýǵa jaqyn, al bıyl taǵy bir mańyzdy kórnekti oryn — Býrhan-Bulaq sarqyramasyna aparatyn joldyń qurylysy bastaldy. Sonymen qatar, ınjenerlik ınfraqurylymmen qamtamasyz etý jumystary da qatar júrip jatyr. Osylaısha, týrıstik nysandardyń qoljetimdiligin qamtamasyz etý men salany damytýǵa qajetti jaǵdaılar jasaý boıynsha barlyq jumys atqarylýda, — dedi oblys ákimi Beıbit Isabaev.
Aımaq basshysynyń aıtýynsha, jyl sońyna deıin oblysta týrızmdi damytýǵa jaýapty basqarma qurylyp, aýdan men qalalarda týrızm salasynyń mamandary kóbeıtiledi. Sonymen qatar, kelesi shomylý maýsymyna deıin Alakól men Balqash kólderiniń jaǵalaýyn sanıtarlyq jaǵynan kútip-ustaýǵa jaýapty kommýnaldyq kásiporyn qurylmaq. Osyǵan baılanysty kadr máselesi ózekti bolyp otyr.
— Bizge til biletin, týrızmdi damytýdyń zamanaýı kózqarasyna ıe mamandar qajet. Osy maqsatta bıyl Alakól aýdanyndaǵy kolledjde «Týrızm» mamandyǵy ashyldy. Jetisý ýnıversıtetinde de osy baǵytta mamandar daıarlanýda. Árıne, bul tek bastamasy. Mańyzdysy — jergilikti týrıstik bıznes ókilderi de bilikti kadrlardy tartý isine belsendi aralasýy kerek. Bizge aýdarmashylar, gıdter, menedjerler men uıymdastyrýshylar qajet. Bul — týrızmniń tabysty damýyna yqpal etetin taǵy bir mańyzdy faktor, — dedi Isabaev.
Málimetke sáıkes, ótken jyly Jetisý oblysyn 2 mıllıon adam kelip tamashalaǵan, bul 2023 jylmen salystyrǵanda 11 paıyzǵa artyq. Al sheteldik týrıster sany 63,6 paıyzǵa ósken. Infraqurylymnyń damýy ornalastyrý oryndarynyń kóbeıýine, aqyly qyzmetter kólemi men bıýdjetke túsetin túsimderdiń artýyna sep bolǵan.
Buǵan qosa, Jetisý oblysy týrızm salasynda memlekettik qoldaý sharalaryn ıgerý boıynsha respýblıkada úshinshi orynda tur.
— Bıznestiń ózi de ınvestorlar tartýmen, týrızmdi ilgeriletýmen jáne jarnamalaýmen aınalysýy kerek. Osylaısha, birlesken kúsh-jiger arqyly óńirdiń áleýmettik-ekonomıkalyq damýyna yqpal etetin qajetti nátıjege qol jetkizemiz, — dep túıindedi B. Isabaev. Sonymen qatar, ol jaýapty tulǵalarǵa birqatar tapsyrmalar berdi. Atap aıtqanda: týrıstik nysandardy zańdastyrý, adal kásipkerlik qyzmetti yntalandyrý, týrıstik ınfraqurylym jobalaryn ýaqytynda ári sapaly aıaqtaý, týrızm basqarmasyn qurý syndy mindetter júkteldi.
Buǵan deıin Jetisý oblysynda zamanaýı akkýmýlıator zaýyty iske qosylyp, 180 jańa jumys orny ashylǵany habarlanǵan bolatyn.