Jetisý oblysynda tirkeýde turǵan azamattarǵa arnalǵan «Jeruıyq» turǵyn úı baǵdarlamasy iske qosyldy
TALDYQORǴAN. KAZINFORM – Aýyl turǵyndaryna arnalǵan «Jeruıyq» baǵdarlamasyna ótinim qabyldaý 10 qyrkúıekten 10 qazanǵa deıin jalǵasady. 5 paıyzdyq mólsherlememen beriletin ıpotekany muǵalim, dáriger, memlekettik qyzmetshiler men áleýmettik osal toptaǵy azamattar rásimdeı alady. Baǵdarlamanyń bastapqy jarnasy - 10%, nesıe 19 jylǵa beriledi.
«Jeruıyq» baǵdarlamasyn júzege asyrýǵa oblys bıýdjetinen 1 mlrd teńge qarastyrylǵan. Jańa joba 8 aýdannyń turǵyndaryn qamtıdy. Baǵdarlamaǵa qatysýǵa ótinimderdi aýdan ákimdikterindegi turǵyn úı–kommýnaldyq sharýashylyǵy bóliminde qabyldaıdy.
«Jeruıyq» baǵdarlamasyna ótinim berý úshin kelesi talaptarǵa sáıkes bolý qajet:
- sońǵy 5 jyl ishinde baǵdarlamaǵa qatysýshynyń jáne onyń otbasy músheleriniń menshiginde turǵyn úıdiń (onyń ishinde satyp alý quqyǵymen jalǵa beriletin turǵyn úı men úlestiń) bolmaýy. Otbasy múshelerine: jubaıy, zaıyby jáne olardyń kámeletke tolmaǵan balalary jatady;
- sońǵy jumys ornynda mindetti zeınetaqy jarnalarymen rastalǵan keminde 6 aı jumys ótiliniń bolýy.
- Jetisý oblysynyń aýdandarynda nemese aýyldyq okrýgterinde tirkeýdiń bolýy.
«Otbasy» bank mamandarynyń aıtýynsha úı alýǵa úmitkerler upaı sanyna baılanysty irikteledi.
«Úıdi eń kóp upaı jınaǵandar alady. Olardyń sanyna otbasylyq jaǵdaı, balalardyń bolýy, oblystyq tirkeýdiń uzaqtyǵy áser etedi. «Jetim balalar jáne ata-anasynyń qamqorlyǵynsyz qalǵan balalar» sanaty boıynsha baǵdarlamaǵa qatysýshylar, sondaı-aq múmkindigi shekteýli azamattar nemese múmkindigi shekteýli balalardy tárbıelep otyrǵan azamattar qosymsha upaı qosylady», - deıdi «Otbasy bank» AQ Jetisý oblystyq fılıalynyń resmı ókili Ásel Dosanova.
Eske sala keteıik bıyl «Otbasy banki» AQ túrli áleýmettik toptar úshin jeńildetilgen shartpen birneshe memlekettik ıpotekalyq baǵdarlama usynǵanyn jazǵan bolatynbyz.
