Jetisý oblysynda tórtem bosanǵan ana perzenthanadan shyqty
ASTANA. KAZINFORM – Jetisý oblysynyń 31 jastaǵy turǵyny birden tórt ul balany dúnıege ákeldi. Búgin anasy men sábıleri perzenthanadan saltanatty túrde shyǵaryldy, dep habarlady Densaýlyq saqtaý mınıstrligi.
Qýanyshty oqıǵa Almatydaǵy Akýsherlik, gınekologııa jáne perınatologııa ǵylymı ortalyǵynda boldy. Tórtemniń dúnıege kelýimen otbasyndaǵy bala sany jeteýge jetti.
Náresteler 24 qyrkúıekte júktiliktiń 30 aptasy 6 kúninde kesar tiligi arqyly dúnıege kelgen. Ata-anasy sábılerge Arlan, Arsylan, Álıhan jáne Ámirhan degen esimder qoıǵan.
– Birden tórt bala kútip júrgenimdi bilgende, boıymdy san túrli sezim bıledi. Tańǵaldym, qýandym, árıne, qobaljydym. Alda ońaı jol kútip turmaǵanyn túsindim, biraq bári jaqsy bolatynyna sendim. Maǵan jáne sábılerime qamqorlyq kórsetip, qoldaý bildirgen dárigerler men barlyq medıtsına qyzmetkerlerine sheksiz alǵys aıtamyn! – dedi tórtemniń anasy.
Mınıstrliktiń málimetinshe, tórtemge júkti bolý – óte sırek kezdesetin jaǵdaı. Mundaı júktilik dárigerlerden joǵary kásibı biliktilik pen erekshe baqylaýdy talap etedi.
Bolashaq ana júktiliktiń 23-aptasynan bastap ortalyq mamandarynyń baqylaýynda bolǵan. Merziminen buryn bosaný qaýpi joǵary bolǵandyqtan, dárigerler ana men sábılerdiń jaǵdaıyn turaqty qadaǵalap, yqtımal asqynýlardyń aldyn alý sharalaryn júrgizgen.
Medıtsınalyq kómekti uıymdastyrýǵa akýsher-gınekologtar, anestezıolog-reanımatologtar men neonatologtar jumyldyrylǵan.
Densaýlyq saqtaý mınıstrligi mundaı kúrdeli jaǵdaılarda ana men nárestelerdiń densaýlyǵyn saqtaý úshin mamandardyń úılesimdi jumysy men joǵary tehnologııalyq medıtsınalyq kómektiń mańyzy zor ekenin atap ótti.
Aıta keteıik, buǵan deıin Astanada da tórtem dúnıege kelgen bolatyn. 2016 jyly elordadaǵy perınataldyq ortalyqta 34 jastaǵy áıel eki ul men eki qyzdy ómirge ákelgen.
