Jetisý oblysynda tonna-tonna pııaz dalada shashylyp jatyr
TALDYQORǴAN. KAZINFORM — Jetisý oblysynda 150 tonnadaı pııaz dalada shashylyp jatyr. Sebep - eskeldilik sharýanyń jaz boıy bel jazbaı jıǵan ónimin ótkize almaýy. Shirip bara jatqan pııazdy tógýden basqa amaly qalmapty.
«Alatyn adam bolmaı qaldy ǵoı. Qoımany jalǵa alǵan, bárine adam jaldaý kerek. Sodan menen kómek surady. Uıalǵanymnan kelistim, sharýalarǵa da ońaı emes. 9 mln aqshasy kúıip ketti», — dedi pııaz tógilgen jerdiń ıesi Qanaǵat Qarıpov.
Al, jergilikti ákimdik ókilderi bul jaǵdaıdan habardar. Sharýanyń «ónimdi sata almaı otyrǵanyn aıtyp, kómek suramaǵanyn» alǵa tartady. Belgili bolǵanyndaı, qojalyq ıesi 3 gektarǵa pııaz sebedi.
«Pııaz ósirýmen shuǵyldanatyn sharýa qojalyǵy bizden kómek suraǵan joq. Asylynda aýdanda apta saıyn jármeńke uıymdastyrylatynyn biledi. Ótpeı qalǵan jýa ysyrap boldy», — deıdi Eskeldi aýdandyq aýyl sharýashylyǵy jáne jer qatynastary bóliminiń basshysy Qýat Qojahmetov.
Qap-qap pııazdyń dalaǵa tógilýi máselesin agenttik tilshisi buǵan deıin saraptap kórgen edi. Fermerler muny Aýyl sharýashylyǵy, Saýda jáne ıntegratsııa mınıstrlikteri ustanǵan saıasattyń «jemisi» dep otyr. Óıtkeni, artylǵan ónimdi eksporttaý shekarada aldan shyǵatyn tosqaýyldardyń kesirinen múmkin bolmaǵan. Saldarynan 130 myń tonna pııazdyń bosqa shirip ketýi múmkin ekendigi aıtylǵan edi.
