Jetisý oblysynda Taldyqorǵan-Úsharal baǵytynda kólik qozǵalysyna shekteý qoıyldy

TALDYQORǴAN. KAZINFORM — Búgin «Almaty-Óskemen» avtojolynyń 287-557 shaqyrymy aralyǵynda júk kólikteri men qoǵamdyq kólikterge shekteý qoıyldy. Jergilikti polıtsııa qyzmetkerleri jolaýshylarǵa jolda saq bolýdy eskertedi.

«QazAvtojol» UQ-nyń málimetinshe, aýa raıynyń qolaısyzdyǵyna baılanysty Taldyqorǵan — Úsharal baǵyty boıynsha ýaqytsha shekteý qoıyldy.

— Saǵat 22:00-den bastap «Almaty-Óskemen» avtojolynyń 287-557 shaqyrym aralyǵynda (Taldyqorǵan qalasynan Úsharal qalasyna deıin) júk kólikteri men qoǵamdyq kólikterge (avtobýs) shekteý qoıyldy, — delingen habarlamada.

Sondaı-aq, jolǵa jaýapty kompanııa táýlik boıy júrgizýshilerge respýblıkalyq trassalardyń jaǵdaıy týraly málimetti usynýǵa daıyn. Aqparatty 1403 baılanys ortalyǵyna habarlasyp bilýge bolady.

Aıta keteıik, qys bastalǵaly beri respýblıkalyq mańyzy bar avtomobıl joldaryn tazalaýǵa 2387 sharshy metr qum, 1829 tonna tuz, 8000 tonnadan astam qıyrshyq tas jáne 68 tonna hımııalyq reagentter paıdalanylǵan. Bul — jol jabynyn jedel tazalaýǵa jáne kóktaıǵaqtyń aldyn alyp, júrgizýshiler úshin qolaıly ári qaýipsiz qozǵalysty qamtamasyz etý úshin baǵyttalǵan.

Eske salaıyq, buǵan deıin Jetisý oblysy joldarynyń qys mezgiline daıyndyǵyn jazǵanbyz.