Jetisý oblysynyń turǵyny 2 suńqardy úıinde zańsyz ustaǵan

TALDYQORǴAN. KAZINFORM — Jetisý oblysynda krımınaldyq polıtsııa basqarmasynyń qyzmetkerleri «Brakoner» jedel-profılaktıkalyq is-sharasy aıasynda sátti operatsııa júrgizdi. Nátıjesinde Kerbulaq aýdanynyń turǵyny ustaldy. 

Polisia.kz portalynyń málimetinshe, atalǵan azamat óz úıinde eki suńqar men qoldan jasalǵan tordy zańsyz saqtap kelgen.

Atalǵan jaǵdaı boıynsha elimizdiń Qylmystyq kodeksine sáıkes, sırek kezdesetin jáne joıylyp ketý qaýpi bar janýarlardy zańsyz ustaý deregi boıynsha sotqa deıingi tergeý bastaldy. Tárkilengen qustar arnaıy mamandardyń qaraýyna berilip, olardyń jaǵdaıy baqylaýǵa alyndy. 

Polıtsııa tabıǵatty qorǵaýǵa baǵyttalǵan «Zań jáne tártip» tujyrymdamasy aıasyndaǵy jumysyn jalǵastyryp jatyr. Bul bastamanyń negizgi maqsaty — elimizdiń tabıǵı baılyqtaryn saqtaý jáne ekologııalyq tepe-teńdikti buzatyn áreketterdiń jolyn kesý.

Quqyq qorǵaý organdary barlyq azamatty tabıǵatty aıalaýǵa shaqyrady. 

Eske salsaq, budan buryn ShQO-da Qyzyl kitapqa engen qusty ustap alǵan turǵynǵa qatysty qylmystyq is qozǵalǵanyn jazǵan edik.