Jetisý oblysynda Sıvers alma aǵashynyń gúldeýine arnalǵan festıval ótedi
TALDYQORǴAN. KAZINFORM – Jetisý oblysynda 2026 jylǵy 2 mamyrda Sıvers alma aǵashynyń gúldeýine arnalǵan festıval uıymdastyrylady. Іs-shara «Jońǵar Alataýy memlekettik ulttyq tabıǵı park» aýmaǵynda, Jetisý Alataýynyń eteginde ótedi.
Іs-shara «Jońǵar-Alataý» memlekettik ulttyq tabıǵı parkiniń aýmaǵynda, Sarqan aýdany Topolevka aýylynyń kórkem mańynda uıymdastyrylady. Bul oryn kezdeısoq tańdalǵan joq: dál osy jerde jer sharyndaǵy Sıvers jabaıy almasynyń eń iri toǵaılary ornalasqan. Ol – jer betindegi barlyq mádenı alma sorttarynyń arǵy tegi.
Ǵalymdardyń baǵalaýynsha, osy biregeı almanyń álemdik tabıǵı qorynyń shamamen 48%-y Jetisý óńirinde shoǵyrlanǵan. Jylyna bir-aq ret, kóktemniń birneshe aptasy ishinde taý betkeıleri názik aq jáne qyzǵylt gúlge oranyp, alqaptardy naǵyz kórkem tabıǵı kóriniske aınaldyrady. Osy kezeńde myńdaǵan týrıster, fotograftar men saıahatshylar óńirge kelip, sırek tabıǵı qubylysty tamashalap, onyń tarıhymen tanysyp, festıval atmosferasyn sezinedi.
Festıval týrızm salasynyń ókilderin, ekologtardy, ǵalymdardy, BAQ ókilderin, trevel-blogerlerdi, qolónershilerdi, mádenıet qaıratkerlerin, sondaı-aq stýdentter men tabıǵat súıer qaýymdy biriktiredi. Bul shara ekotýrızmdi damytýǵa, tabıǵı murany saqtaýǵa jáne óńirdi halyqaralyq deńgeıde tanytýǵa arnalǵan alań bolmaq.
Іs-shara Qazaqstannyń respýblıkalyq is-sharalar kúntizbesine engizilgen, bul onyń mańyzdylyǵy men týrıstik tartymdylyǵyn aıqyndaıdy.
Bıylǵy festıval qonaqtary úshin erekshe atmosfera usynylady. Hedlaınerler – Bayansulu jáne Qýandyq Rahym sahnaǵa shyǵyp, gúldegen taýlar aıasynda jarqyn kontserttik baǵdarlama usynady.
Festıval baǵdarlamasy:
* Sıvers almasynyń gúldegen baý-baqshalarynyń panoramalyq kórinisteri;
* Plein air formatyndaǵy sýretshiler baıqaýy;
* Mádenı is-sharalar;
* Ulttyq sport oıyndary;
* Qolóner kórmeleri jáne sheberlik sabaqtary;
* Kontserttik jáne oıyn-saýyq baǵdarlamalar.
«Sıvers almasynyń gúldenýi» festıvali – Qazaqstannyń eń ásem tabıǵı qubylystarynyń birin tamashalap, taýlar men taza aýa aıasynda ótkizýge, ulttyq mádenıetpen jaqynyraq tanysýǵa jáne umytylmas áser alýǵa múmkindik beredi.
