Jetisý oblysynda shegirtke oshaqtary tirkeldi
ASTANA. KAZINFORM — Jetisý oblysynda shegirtke zııankesterine qarsy kúrestiń belsendi kezeńi bastaldy. Olardyń jappaı taralýyna jol bermeý úshin óńirde avıatsııa, drondar jáne jerústi arnaıy tehnıkalary qoldanylyp jatyr.
Bıyl óńirde 133,4 myń gektar aýyl sharýashylyǵy alqabyna hımııalyq óńdeý júrgizý josparlanǵan. Mamandardyń aıtýynsha, bul ótken jylǵy kórsetkishten (152,6 myń gektar) az bolǵanymen, qaýiptiń tómendegenin emes, shegirtke oshaqtaryn dálirek anyqtap, aýmaqtardy nysanaly túrde óńdeýdi bildiredi.
Qazirgi tańda 8,4 myń gektar aýmaqta shegirtke oshaǵy tirkelgen. Jaǵdaı oblystyń birneshe aýdanyn qamtyp otyr. Shegirtke túrleri Aqsý, Qaratal, Kóksý jáne Panfılov aýdandarynda, sondaı-aq Taldyqorǵan qalasynda anyqtalǵan. Jalpy taralý aýmaǵy — 4,1 myń gektar.
Qanatty úıirlerge tez birige alatyndyqtan asa qaýipti sanalatyn úıirli shegirtkege erekshe nazar aýdarylady. Onyń oshaqtary Alakól, Qaratal, Kerbulaq, Kóksý jáne Panfılov aýdandarynda anyqtalǵan. Munda zııankes 4,3 myń gektar aýmaqqa taralyp, sonyń 3,7 myń gektary óńdelip úlgergen.
Eń kúrdeli jaǵdaı Panfılov aýdanynda baıqaldy. Birlik, Taldy jáne Sarybel aýyldyq okrýgterinde shegirtke 2 myń gektardan astam jerge taraǵan, alaıda aýmaqtyń negizgi bóligi qazirdiń ózinde óńdelgen.
Oblystyq fıtosanıtarlyq dıagnostıka jáne boljamdar fılıalynyń basshysy Baqbergen Atantaevtiń aıtýynsha, qazirgi basty mindet — ýaqytty ótkizip almaý.
— Búgingi tańda eń mańyzdysy — oshaqtardy der kezinde anyqtaý. Shegirtke damýdyń bastapqy kezeńinde bolyp, qanatty úıirge aınalyp úlgermegen kezde júrgizilgen óńdeý eń joǵary nátıje beredi, — dedi ol.
Onyń sózinshe, monıtorıng kún saıyn júrgiziledi, oǵan drondar men avıatsııa da tartylǵan.
— Biz úzdiksiz rejımde jumys istep jatyrmyz. Qol jetýi qıyn aýmaqtardy tekserý úshin drondardy paıdalanamyz, — dedi spıker.
Zııankesterge qarsy kúreske alty áýe kemesi, 24 jerústi búrký tehnıkasy jáne 233 maman jumyldyrylǵan.
Jalpy, bıyl Qazaqstan boıynsha 2,2 mln gektar jerdi óńdeý josparlanyp otyr. Jetisý oblysynda mamandar der kezinde qabyldanǵan sharalar zııankestiń jappaı taralýyna jol bermeı, bolashaq ónimdi saqtap qalýǵa kómektesedi dep esepteıdi.
Aıta keteıik, shegirtkege qarsy hımııalyq óńdeý sharalary Batys Qazaqstan oblysynda da jylma-jyl júrgiziledi.
Sondaı-aq shegirtkege qarsy hımııalyq óńdeý qyzmetteri biryńǵaı júıe arqyly satyp alynady.
