Jetisý oblysynda segiz jańa sý qoımasy salynady
ASTANA. KAZINFORM – 2028 jylǵa deıin Jetisý oblysynda segiz jańa sý qoımasy salynyp, shamamen úsh myń shaqyrym ırrıgatsııalyq kanal rekonstrýktsııalanady, dep habarlaıdy Sý resýrstary jáne ırrıgatsııa mınıstrligi.
Sala mınıstri Nurjan Nurjigitov Jetisý oblysynyń turǵyndarymen kezdesip, sý sharýashylyǵyn damytýǵa baǵyttalǵan josparlar týraly aıtty.Onyń málimetinshe, Aqsý, Kóksý, Panfılov, Sarqan, Alakól aýdandarynda jáne Taldyqorǵan qalasynda jalpy segiz jańa sý qoımasyn salý kózdelgen. Nysandar Bıen, Bije, Qorǵas, Úsek, Tyshqan, Balyqty, Jamanty jáne Basqan ózenderi boıynda ornalasady.
Budan bólek, úsh sý qoımasyn rekonstrýktsııalaý jáne uzyndyǵy 2930 shaqyrym bolatyn kanaldardy jańartý, sondaı-aq 236,8 shaqyrym sý arnasyn avtomattandyrý josparlanyp otyr. Sonymen qatar 17 gıdrotehnıkalyq nysanda keshendi zertteý jumystary júrgiziledi.
«Bizdiń jumysymyzdyń basym baǵyttarynyń biri – sý sharýashylyǵy ınfraqurylymyn jóndeý jáne jańǵyrtý. Qazir júzege asyrylyp jatqan gıdrotehnıkalyq qurylysjaılardy salý men rekonstrýktsııalaý, ırrıgatsııa jelilerin avtomattandyrý jobalary sýdy paıdalaný tıimdiligin aıtarlyqtaı arttyryp, onyń shyǵynyn azaıtýǵa múmkindik beredi. Vegetatsııa kezeńiniń qorytyndysy kórsetkendeı, agrarlyq sektordyń tıimdiligi sý resýrstaryn qanshalyqty saýatty jáne jaýapkershilikpen basqarýǵa baılanysty. Bul tek naqty josparlaýdy ǵana emes, sý salasyn júıeli damytýdy da talap etedi», – dedi Sý resýrstary jáne ırrıgatsııa mınıstri Nurjan Nurjigitov.
Kezdesý barysynda turǵyndar sý únemdeý tehnologııalaryna jumsalǵan shyǵyndardy sýbsıdııalaý jáne sý tutyný normalaryn qaıta qaraý máselelerin kóterdi. Keıin mınıstr azamattardy jeke qabyldap, gıdroelektr stantsııalary men bógetter qurylysy, ırrıgatsııa kanaldaryn jóndeý sııaqty taqyryptar boıynsha suraqtarǵa jaýap berdi.
Aıta keteıik, Jetisý oblysyndaǵy aýyldardy sýmen qamtýǵa 480 mln teńge bólindi.