Jetisý oblysynda regbı oıynyn damytýǵa 387 mln teńge bólingen
ASTANA. KAZINFORM – Áleýmettik jelide Jetisý oblysynda regbıdi damytýǵa memlekettik bıýdjetten bólingen qarajattyń tıimdiligi qyzý talqylanyp jatyr.
Aqparatqa sáıkes, Taldyqorǵan qalasynda bıýdjet qarajatyn únemdeý rejımi aıasynda oblystyń sport uıymdaryna oqý-jattyǵý protsesin uıymdastyrý qyzmetterin satyp alý, sondaı-aq regbı boıynsha oblystyq qurama komandalar múshelerin daıarlaý jáne olardyń jarystarǵa qatysýyn qamtamasyz etý josparlanyp otyr. Atalǵan maqsattarǵa bólingen jalpy qarjy kólemi 387 mln teńgeni quraıdy. Osyǵan baılanysty elde keńinen tanymal sport túrleriniń alǵashqy ondyǵyna kirmeıtin regbıge mundaı kólemde qarajat bólý oryndy ma degen suraq qoǵamdyq keńistikte kóterilýde.
Jetisý oblysynyń dene shynyqtyrý jáne sport basqarmasy regbı aımaqta ǵana emes, jalpy Qazaqstan boıynsha basym baǵyttardyń biri sanalatynyn málimdedi. Basqarma basshysynyń orynbasary Erkebulan Dýanaevtyń aıtýynsha, óńirde sportshylardy daıarlaýdyń tolyq júıesi qalyptasqan.
«Óńirde regbı boıynsha mamandandyrylǵan balalar men jasóspirimder sport mektebi, mamandandyrylǵan bólimshe jáne kásibı klýb jumys isteıdi. Bul uıymdarda Qazaqstan Respýblıkasynyń erler men áıelder quramasynyń múshelerin qosa alǵanda, sportshylar turaqty túrde jattyǵady», – dedi ol.
Onyń sózinshe, óńir komandalary segiz aımaqtyń ujymdary qatysqan Qazaqstan Respýblıkasynyń joǵary lıga komandalary arasyndaǵy chempıonatta kúmis júldege ıe bolǵan.
«Jetekshi sportshylar qazirdiń ózinde Azııa chempıonaty men Azııa oıyndaryna daıyndyq aıasynda ulttyq qurama sapynda jattyǵyp jatyr. Olar halyqaralyq arenada oblys qana emes, tutas el namysyn qorǵaýda», – dep tolyqtyrdy Erkebulan Dýanaev.
Onyń málimetinshe, Jetisý oblysynda ártúrli jastaǵy 600-den astam sportshy regbımen júıeli túrde aınalysady. Bul sport túriniń jappaı damyp kele jatqanyn, turaqtylyǵyn jáne áleýmettik mańyzyn kórsetedi.
«Kásibı sport klýbtaryn qarjylandyrý qoldanystaǵy zańnama talaptaryna qatań sáıkes júzege asyrylady. 387 mln teńge kólemindegi lımıt Týrızm jáne sport mınıstrliginiń buıryǵymen bekitilgen jáne bul aımaqtyq deńgeıdegi jeke sheshim emes, kásibı klýbtarǵa arnalǵan biryńǵaı normatıv bolyp tabylady», – dep túsindirdi ol.
Sonymen qatar basqarma basshysynyń orynbasary bólingen qarajattyń barlyǵy tek oqý-jattyǵý protsesine, resmı jarystarǵa qatysýǵa jáne joǵary deńgeıli sportshylardy daıarlaýǵa baǵyttalatynyn atap ótti. Qazirgi ýaqytta Jetisý oblysynda regbı boıynsha bir ǵana komanda jumys isteıdi, ol Taldyqorǵan qalasynda ornalasqan.
Aıta keteıik, buǵan deıin bir balalar fýtbol alańyn salýǵa qansha qarjy qajet ekeni habarlanǵan bolatyn.