Jetisý oblysynda iri kólemdegi kontrafaktilik alkogol ónimderi áshkerelendi

TALDYQORǴAN. KAZINFORM — Jetisý oblystyq Ekonomıkalyq tergeý departamentiniń qyzmetkerleri byltyr qarjy pıramıdalaryna aqsha salǵan jetisýlyqtardyń 230 mıllıon teńgege jýyq qarajattarynan aırylǵanyn jarııa etti.

Sondaı-aq aımaqta jalǵan kásipkerlikpen aınalysýshy alaıaqtardyń da sany kóbeıgen. Jyl basynan beri departament tek kontrafaktilik ónim boıynsha 4 qylmystyq is qozǵady.

Ekonomıkalyq tergeý departamenti kásipkerlik qyzmetti tirkeýsiz jáne mindetti lıtsenzııasyz júzege asyrǵan adamdar tobyn áshkerelegen. Tergeý barysynda 48,5 myńǵa jýyq qorap temeki, quramynda spırt suıyqtyǵy bar 34 kanıstr, 6 myńnan astam bótelke alkogol ónimi tárkilenip, joıyldy.

- Departament aktsızdeletin ónimniń kóleńkeli aınalymyna qarsy kúres sheńberinde alkogol ónimin óndirý boıynsha jerasty tsehtarynyń qyzmetin toqtatyldy. Bul tsehtar Almaty oblysynyń mańynda ornalasqan, al ónimderin jetkizý tek Jetisý oblysynyń aýmaǵynda júzege asyrylǵan. Sondaı-aq, ekonomıkalyq tergeý departamentiniń qyzmetkerleri Jetisý oblysynda ótken jyly 230 mıllıon teńgege jýyq qarjy salǵan úsh qarjylyq pıramıdany anyqtady, - deıdi Jetisý oblysy Ekonomıkalyq tergeý departamentiniń mańyzdy ister jónindegi jedel ýákili Erbol Qurmanbaev.

Aldaǵy ýaqytta qarjylyq qylmystar boıynsha QR zańdarynyń buzylýyn anyqtaý jumystary kúsheıtilmek.