Jetisý oblysynda polıtsııa qyzmetkerine qol kótergen turǵyn sottaldy
TALDYQORǴAN. KAZINFORM – Jetisý oblysynyń Qaratal aýdanynda polıtsııa qyzmetkerine kúsh qoldanǵan Úshtóbe qalasynyń turǵynyna qatysty sot úkimi shyqty.
Jetisý oblysy prokýratýrasynyń málimetinshe, oqıǵa ýchaskelik ınspektordyń «102» pýltine túsken shaqyrtý boıynsha barǵan kezinde bolǵan.
Tergeý barysynda er adamnyń polıtsııa qyzmetkeriniń zańdy talabyna baǵynbaı, agressııa tanytqany anyqtalǵan.
Ol tártip saqshysynyń betinen alaqanmen uryp, qyzmettik beınejetonyn julyp alǵan jáne pogonyn zaqymdaǵan.
Memlekettik aıyptaýshy sottalýshynyń kinásin dáleldeıtin jetkilikti aıǵaqtar usynǵan.
- Sot sheshimimen qyzmettik mindetin atqaryp júrgen polıtsııa qyzmetkerine shabýyl jasaǵan azamat 2 jylǵa bas bostandyǵyn shekteý jazasyna kesildi.
Sonymen qatar sottalǵan adam májbúrli eńbekke tartylyp, memleketke keltirilgen materıaldyq shyǵyn tolyq óndirildi, - dep jazdy qadaǵalaýshy organnan.
Jetisý oblysynyń prokýratýrasy quqyq qorǵaý organdary qyzmetkerlerine qatysty kez kelgen zańsyz áreket qatań jaýapkershilikke ákep soǵatynyn eskertti.
Úkim zańdy kúshine endi.
Aıta keteıik, Almatyda ýrbanıstıka basqarmasynyń burynǵy basshysyna qatysty sot qaıta bastaldy.
